पीएसजीले लगातार दोस्रोपटक यूईएफए च्याम्पियन्स लिगको उपाधि जित्यो

Prime TV News ५ दिन अगाडि

काठमाडौ ।पेनाल्टी सुटआउटमा इंग्लिस क्लब आर्सनललाई  ४–३ ले पराजित गर्दै फ्रान्सको पेरिस सेन्ट–जर्मेन (पीएसजी) ले लगातार दोस्रोपटक यूईएफए च्याम्पियन्स लिगको उपाधि जितेको छ ।

शनिबार हंगेरीको पुस्कास एरेनामा सम्पन्न फाइनलको निर्धारित र अतिरिक्त समय १–१ गोलको बराबरीमा सकिएपछि विजेताको टुंगो पेनाल्टी सुटआउटबाट लगाइएको हो ।

पेनाल्टीमा पीएसजीका लुकास बेराल्डो, अचरफ हाकिमी, डेसिरे डुए र गोन्सालो रामोसले गोल गरे । नुनो मेन्डिसको प्रहार भने गोलमा परिणत हुन सकेन ।

आर्सनलका गाब्रियल मार्टिनेज, डेक्लान राइस र भिक्टर ग्योकेरेसले गोल गरे । गाब्रियल म्यागाल्हेस र एबेरेची एजे भने चुके  । त्यसअघि खेलको छैटौँ मिनेटमै काइ हाभर्ट्जको गोलमार्फत आर्सनलले अग्रता लिएको थियो । ६४औँ मिनेटमा ओस्माने डेम्बेलेले पेनाल्टीमा गोल गर्दै पीएसजीलाई बराबरीमा ल्याएका थिए ।

यस जितसँगै पीएसजी सन् २०१६ देखि २०१८ सम्म लगातार तीनपटक उपाधि जितेको रियाल मड्रिडपछि च्याम्पियन्स लिगको उपाधि रक्षा गर्ने पहिलो क्लब बनेको छ । २० वर्षपछि च्याम्पियन्स लिग फाइनलमा पुगेको आर्सनल पहिलो उपाधि जित्न भने वञ्चित रह्यो ।