बर्ड फ्लु संक्रमण पुष्टि भएपछि सदर चिडियाखाना अनिश्चितकालका लागि बन्द

Prime TV News ४ घण्टा अगाडि

काठमाडौ । ललितपुरको जावलाखेलस्थित सदर चिडियाखाना अनिश्चितकालका लागि बन्द गरिएको छ।

चिडियाखाना परिसरभित्र रहेका जीवजन्तुहरूमा बर्ड फ्लु संक्रमण देखिएपछि आजदेखि अर्को सूचना जारी नभएसम्मका लागि चिडियाखाना बन्द गरिएको व्यवस्थापनले जनाएको छ। चिडियाखानाले जारी गरेको सूचनामा संक्रमण नियन्त्रण तथा रोकथामका लागि आवश्यक सावधानी अपनाउन यो निर्णय गरिएको उल्लेख छ।

संक्रमणको थप फैलावट रोक्न तथा जीवजन्तु र आगन्तुकहरूको सुरक्षालाई ध्यानमा राख्दै चिडियाखाना बन्द गरिएको जनाइएको छ। संक्रमण पुष्टि भएपछि सम्बन्धित निकायहरूले आवश्यक परीक्षण, निगरानी तथा नियन्त्रणका कार्य अघि बढाएका छन्। चिडियाखाना पुनः सञ्चालनबारे भने अवस्था मूल्याङ्कनपछि निर्णय गरिने बताइएको छ।

सदर चिडियाखाना देशकै प्रमुख पर्यटकीय तथा शैक्षिक आकर्षणमध्ये एक मानिन्छ। चिडियाखाना बन्द भएसँगै दैनिक अवलोकनका लागि आउने सर्वसाधारण तथा विद्यार्थीहरू प्रभावित हुने भएका छन्।