एम्बाप्पेको शानदार प्रदर्शनमा फ्रान्स विश्वकपको सेमिफाइनलमा

Prime TV News १ हप्ता अगाडि

काठमाडौ । किलियन एम्बाप्पेको उत्कृष्ट प्रदर्शनमा फ्रान्सले मोरक्कोलाई २–० ले पराजित गर्दै फिफा विश्वकप २०२६ को सेमिफाइनलमा स्थान पक्का गरेको छ।

कतार विश्वकप २०२२ को सेमिफाइनलमा भोगेको हारको बदला लिने लक्ष्यसहित मैदान उत्रिएको मोरक्को फ्रान्सको आक्रामक खेलअघि निरीह बन्यो। सुरुदेखि नै फ्रान्सले खेलमा दबाब बनाएको थियो।

पहिलो हाफमा फ्रान्सले धेरै अवसर सिर्जना गरे पनि गोल गर्न सकेन। माइकल ओलिसेको पासमा अघि बढेका एम्बाप्पेलाई पेनाल्टी क्षेत्रमा लडाइएपछि फ्रान्सले पेनाल्टीको अवसर पाएको थियो। तर लामो प्रतीक्षापछि एम्बाप्पेले गरेको प्रहार मोरक्कोका गोलरक्षक यासिन बोनुले बचाएका थिए।

बोनुले त्यसपछि पनि फ्रान्सका केही उत्कृष्ट प्रहार रोकेका थिए भने लुकास डिन्येको शक्तिशाली प्रहार क्रसबारमा लाग्दा फ्रान्स पहिलो हाफमा गोल गर्न असफल रह्यो।

दोस्रो हाफमा भने फ्रान्सले खेलको नतिजा आफ्नो पक्षमा पार्न सफल भयो। खेलको करिब एक घण्टा पूरा हुँदा मोरक्कोको कमजोर क्लियरेन्सलाई सदुपयोग गर्दै एम्बाप्पेले शानदार गोल गरे। उनको तीव्र प्रहार गोलरक्षक बोनुले रोक्न सकेनन्।

त्यसपछि एम्बाप्पेले अर्को उत्कृष्ट अवसर सिर्जना गर्दै ओस्मान डेम्बेलेलाई गोलका लागि पास उपलब्ध गराए। डेम्बेलेले त्यस अवसरलाई सदुपयोग गर्दै फ्रान्सको अग्रता दोब्बर बनाए।

खेल सकिन १३ मिनेट बाँकी रहँदा एम्बाप्पेलाई विश्राम दिइएको थियो। मैदानबाट बाहिरिने क्रममा दर्शकहरूले उभिएर ताली बजाउँदै उनको सम्मान गरेका थिए।

यस जितसँगै दुई पटकको विश्वविजेता फ्रान्सले विश्वकपको उपाधि यात्रालाई निरन्तरता दिएको छ। लगातार प्रभावशाली प्रदर्शन गरिरहेको फ्रान्सलाई प्रतियोगिताको बलियो उपाधि दाबेदारका रूपमा हेरिएको छ।