फकल्याण्ड ब्यानर प्रदर्शनपछि अर्जेन्टिनी खेलाडीमाथि फिफाको अनुसन्धान

Prime TV News ४ दिन अगाडि

काठमाडौ । विश्वकप २०२६ को सेमिफाइनलमा इङ्ल्यान्डलाई पराजित गरेपछि फकल्याण्ड टापुसम्बन्धी राजनीतिक सन्देश रहेको ब्यानर प्रदर्शन गरेका अर्जेन्टिनाका खेलाडीमाथि फिफाले अनुसन्धान सुरु गरेको छ।

अर्जेन्टिनाले इङ्ल्यान्डलाई २–१ ले हराएपछि डिफेन्डर लिसान्ड्रो मार्टिनेज र बेन्चमा रहेका जियोभानी लो सेल्सोले ‘लास माल्भिनास सोन अर्जेन्टिनास’ (फकल्याण्ड टापु अर्जेन्टिनाकै हो) लेखिएको ब्यानर प्रदर्शन गरेका थिए।

फिफाले उक्त गतिविधिले स्टेडियम आचारसंहिता उल्लङ्घन गरे/नगरेको विषयमा स्वतन्त्र अनुशासन समितिले खेल प्रतिवेदन र घटनाको मूल्याङ्कन गरिरहेको जनाएको छ। अनुसन्धानपछि फिफा अनुशासन संहिताअनुसार आवश्यक निर्णय लिइनेछ।

फिफाको नियमअनुसार राजनीतिक, वैचारिक, धार्मिक वा आपत्तिजनक सन्देश प्रदर्शन गर्न निषेध गरिएको छ। उल्लङ्घन पुष्टि भए अर्जेन्टिनी खेलाडी वा अर्जेन्टिना फुटबल महासंघमाथि जरिवाना हुन सक्नेछ। यस्ता घटनामा फिफाले सामान्यतया ५ हजारदेखि २० हजार अमेरिकी डलरसम्म जरिवाना गर्ने गरेको छ।

घटनापछि बेलायतमा राजनीतिक प्रतिक्रिया पनि आएको छ। बेलायती अधिकारीहरूले फुटबल र राजनीतिलाई अलग राख्नुपर्ने भन्दै फिफाबाट निष्पक्ष अनुसन्धानको अपेक्षा गरेका छन्। अर्जेन्टिनाका राष्ट्रपति हाभियर मिलेईले भने खेलाडीहरूको व्यवहारलाई समर्थन गर्दै उक्त सन्देश अर्जेन्टिनी जनताको भावनासँग जोडिएको बताएका छन्।

उनले खेलाडीहरू भावनामा बगेर यस्तो कदम चालेको हुन सक्ने र जरिवानाको सम्भावना रहेको स्वीकार गरेका छन्। फकल्याण्ड टापुको विषयलाई लिएर अर्जेन्टिना र बेलायतबीच लामो समयदेखि विवाद रहँदै आएको छ। सन् १९८२ मा भएको फकल्याण्ड युद्धमा ६४९ अर्जेन्टिनी र २५५ बेलायती सैनिकको मृत्यु भएको थियो।

यसअघि पनि यस्तै राजनीतिक सन्देश प्रदर्शनका घटनामा फिफाले कारबाही गरिसकेको छ। सन् २०१४ मा यही नारासहितको सन्देश प्रदर्शन गरेपछि अर्जेन्टिना फुटबल महासंघलाई जरिवाना गरिएको थियो।