डा. पाण्डेको निधनप्रति गगन थापाको श्रद्धाञ्जली, ‘राष्ट्रले प्रखर बौद्धिक व्यक्तित्व गुमायो’
Prime TV News ३ दिन अगाडि 
काठमाडौ । नेपाली कांग्रेसका सभापति गगन थापाले नागरिक अगुवा डा. देवेन्द्रराज पाण्डेको निधनप्रति गहिरो दुःख व्यक्त गर्दै राष्ट्रले एक प्रखर बौद्धिक व्यक्तित्व, नैतिक नेतृत्व र लोकतन्त्रको सजग पहरेदार गुमाएको बताएका छन्।
सामाजिक सञ्जालमार्फत श्रद्धाञ्जली व्यक्त गर्दै थापाले नागरिक स्वतन्त्रता, समानता, मानव अधिकार र लोकतान्त्रिक चेतनाको पक्षमा डा. पाण्डे जीवनभर निर्भीकतापूर्वक उभिएको उल्लेख गरेका छन्।
थापाले नेपालको लोकतान्त्रिक आन्दोलनका निर्णायक मोडहरूमा डा. पाण्डेले नागरिक तहबाट संघर्षको समन्वय गर्दै निरंकुशताविरुद्ध सशक्त आवाज उठाएको र नयाँ पुस्तालाई निरन्तर प्रेरणा दिएको बताएका छन्।
उनले अर्थसचिव, अर्थमन्त्री, विकास चिन्तक तथा सुशासनका अभियन्ताका रूपमा डा. पाण्डेले नेपालको अर्थतन्त्र, सार्वजनिक प्रशासन र विकाससम्बन्धी बहसलाई नयाँ दृष्टिकोण प्रदान गरेको उल्लेख गरेका छन्।
थापाले सार्वजनिक जीवनमा डा. पाण्डेले देखाएको इमानदारी, पारदर्शिता र नैतिक साहस भावी पुस्ताका लागि अमूल्य विरासतका रूपमा रहने विश्वास व्यक्त गरेका छन्।
साथै सामाजिक सद्भाव, समानता र राष्ट्रिय एकताको पक्षमा उनले खेलेको भूमिका विशेष रूपमा स्मरणीय रहने उल्लेख गर्दै उनले प्रज्वलित गरेको नागरिक चेतना र बौद्धिक सम्पदाले आगामी पुस्तालाई मार्गदर्शन गरिरहने बताएका छन्।
