साकाको ह्याट्रिकमा फ्रान्स पराजित, इङ्गल्यान्डले जित्यो विश्वकपको कांस्य पदक
Prime TV News २ दिन अगाडि 
काठमाडौ । बुकायो साकाको उत्कृष्ट ह्याट्रिकको प्रेरणामा इङ्गल्यान्डले फ्रान्सलाई ६–४ ले पराजित गर्दै फिफा विश्वकप २०२६ मा तेस्रो स्थान हासिल गरेको छ।
गोलको वर्षा भएको रोमाञ्चक खेलमा इङ्गल्यान्ड विजयी बने पनि फ्रान्सका कप्तान किलियन एमबाप्पेले विश्वकप इतिहासमा सर्वाधिक गोल गर्ने नयाँ कीर्तिमान कायम गरेका छन्।
सेमिफाइनलमा अर्जेन्टिनासँग पराजित भएको इङ्गल्यान्ड र स्पेनसँग पराजित भएको फ्रान्स तेस्रो स्थानका लागि भिडेका थिए। मियामीमा शनिबार राति सम्पन्न खेलमा दुवै टोलीले सुरुआती रोजाइमा परिवर्तन गरेका थिए।
इङ्गल्यान्डले खेलको तेस्रो मिनेटमै डेक्लान राइसको गोलमार्फत अग्रता लियो। त्यसको केहीबेरमै एज्री कोन्साले हेडमार्फत दोस्रो गोल गर्दै टोलीलाई २–० को बलियो अवस्थामा पुर्याए।
फ्रान्सले खेलमा फर्कने प्रयास गरे पनि इङ्गल्यान्डका गोलकिपर डिन हेन्डरसनले किलियन एमबाप्पे र माइकल ओलिसेका प्रहार उत्कृष्ट रूपमा बचाए।
पहिलो हाफको ३०औं मिनेटपछि बुकायो साकाले तीव्र काउन्टर अट्याकमा गोल गर्दै अन्तर ३–० बनाए। इन्जुरी समयमा उनले व्यक्तिगत दोस्रो गोल गरेपछि इङ्गल्यान्ड पहिलो हाफमै ४–० ले अगाडि रह्यो।
दोस्रो हाफमा प्रशिक्षक डिडियर डेसच्याम्पसले ओसमाने डेम्बेले, दायोट उपामेकानो, लुकास डिग्ने र ब्राड्ली बार्कोलालाई मैदानमा उतारेपछि फ्रान्सले पुनरागमनको संकेत देखायो।
एमबाप्पेले आफ्नो पहिलो गोल गर्दै प्रतियोगितामा गोल संख्या ९ पुर्याए। त्यसपछि बार्कोलाले गोल गरे भने ओलिसेको पासमा एमबाप्पेले व्यक्तिगत दोस्रो गोल गर्दै खेललाई ४–३ को अवस्थामा ल्याए। यससँगै उनले विश्वकप इतिहासमा सर्वाधिक २२ गोल गर्ने खेलाडीको कीर्तिमान बनाए।
तर फ्रान्सको पुनरागमनलाई साकाले रोकिदिए। खेलको अन्त्यतिर डिजेड स्पेन्समाथि भएको फाउलपछि प्राप्त पेनाल्टीलाई उनले गोलमा परिणत गर्दै आफ्नो ह्याट्रिक पूरा गरे र इङ्गल्यान्डलाई ५–३ को अग्रता दिलाए।
अन्तिम समयमा दुवै टोलीबाट थप एक–एक गोल भयो। फ्रान्सका डेम्बेले र इङ्गल्यान्डका जुड बेलिङ्घमले गोल गरेपछि खेल ६–४ को नतिजामा टुंगियो। बेलिङ्घमले यस गोलसँगै एउटै विश्वकप संस्करणमा सात गोल गर्ने पहिलो इङ्गलिस खेलाडीको कीर्तिमान पनि बनाए।
सन् १९६६ मा विश्वकप जितेपछि इङ्गल्यान्डका लागि यो प्रतियोगिताको उत्कृष्ट नतिजा बनेको छ। यता, २०१८ मा फ्रान्सलाई विश्वकप जिताएका तथा २०२२ मा उपविजेता बनाएका प्रशिक्षक डिडियर डेसच्याम्पसको बिदाइ भने हारसँगै भएको छ।
अब विश्वकप २०२६ को उपाधिका लागि सोमबार बिहान न्युजर्सीको इस्ट रदरफोर्डमा तीन पटकको विश्व विजेता अर्जेन्टिना र युरोपेली च्याम्पियन स्पेनबीच फाइनल प्रतिस्पर्धा हुनेछ।
