आईसीसी पुरुष क्रिकेट विश्वकप लिग–२: नेपाल र नामिबियाबीच आज प्रतिस्पर्धा

Prime TV News ८ घण्टा अगाडि

काठमाडौ । आईसीसी पुरुष क्रिकेट विश्वकप लिग–२ अन्तर्गत नेपाल, नामिबिया र नेदरल्यान्ड्सबीचको त्रिकोणात्मक एकदिवसीय सिरिज आजदेखि नेदरल्यान्ड्समा सुरु हुँदै छ।

सिरिजको पहिलो खेलमा नेपालले आज नामिबियाको सामना गर्नेछ। खेल नेपाली समयअनुसार दिउँसो २:४५ बजे स्पोर्टपार्क मार्सचाल्करविर्ड मैदानमा हुनेछ। यो त्रिकोणात्मक सिरिज लिग–२ अन्तर्गतका महत्त्वपूर्ण खेलहरूको हिस्सा हो।

आठ टोली सहभागी प्रतियोगितामा नेदरल्यान्ड्स तेस्रो, नेपाल पाँचौँ र नामिबिया सातौँ स्थानमा रहेका छन्। एकदिवसीय (ओडीआई) मान्यता कायम राख्ने र आगामी विश्वकप छनोटको सम्भावना बलियो बनाउने लक्ष्यसहित मैदान उत्रने नेपालका लागि बाँकी खेलहरू निकै महत्त्वपूर्ण छन्।

नेपालले लिग–२ मा हालसम्म २८ खेल खेल्दै ११ खेलमा जित र १७ खेलमा हार बेहोरेको छ। यस सिरिजमा नेपालले नामिबिया र घरेलु टोली नेदरल्यान्ड्सविरुद्ध दुई–दुई खेल खेल्नेछ। प्रतियोगितामा उत्कृष्ट प्रदर्शन गर्दै अंकतालिकामा सुधार गर्ने लक्ष्यका साथ नेपाली टोली मैदान उत्रनेछ।