एनपीएल दोस्रो संस्करणमा आज दुई कडा भिडन्त, तालिका फेरबदल हुने संकेत

Prime TV News एक महिना अगाडि

काठमाडौ । नेपाल प्रिमियर लिग (एनपीएल) को दोस्रो संस्करणमा आज सोमबार कीर्तिपुरस्थित त्रिवि क्रिकेट मैदानमा दुई महत्वपूर्ण खेल हुँदैछन्।

पहिलो खेल बिहान ११:४५ बजे जनकपुर बोल्ट्स र विराटनगर किंग्स बीच हुनेछ। दोस्रो खेल दिउँसो ४ बजे कर्णाली याक्स र सुदूरपश्चिम रोयल्सबीच खेलिनेछ।

अहिलेसम्म सुदूरपश्चिम र विराटनगर दुवै टोली चार–चार अंकका साथ तालिकाको शीर्ष दुई स्थानमा छन्। काठमाण्डु गुर्खाज तीन खेल खेलेर दुई अंकमा सीमित छ र तेस्रो स्थानमा छ।

लुम्बिनी लायन्स, चितवन राइनोज र कर्णाली याक्सले पनि दुई–दुई अंक जोडेका छन्। जनकपुर बोल्ट्स र पोखरा एभेन्जर्स भने अझै अंकविहीन छन्।

जनकपुरले एक मात्र खेल खेलेको छ भने पोखराले दुवै खेल गुमाएको छ, जसले उनीहरूको प्रारम्भिक प्रदर्शन पूर्ण रूपमा कमजोर बनाएको छ।

एनपीएलका सबै खेल कीर्तिपुरमै दिउँसो र साँझ भइरहेको छन्। नेपाल क्रिकेट सङ्घ (क्यान)ले हरेक खेलका लागि ९ हजार ४५० टिकट बिक्री गर्दै आएको छ। मंसिर १ देखि सुरू भएको प्रतियोगिता मंसिर २७ सम्म चल्नेछ।

यो सिजनमा कुल ३२ खेल छन् । लिग चरणपछि तीन प्लेअफ र अन्तिम फाइनल। शनिबारका लागि टिकट दर साधारणतर्फ ५०० र प्रिमियमतर्फ १५०० छ।

अन्य दिनको लिग चरणमा साधारण ५०० र प्रिमियम १००० तोकिएको छ। प्लेअफपछि साधारण टिकट १००० र प्रिमियम २००० पर्नेछ।

प्रतियोगितामा जनकपुर बोल्ट्स, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाण्डु गुर्खाज र लुम्बिनी लायन्स गरी आठ फ्रेन्चाइज टोली सहभागी छन्। आजका दुई खेलले अंकतालिकामा ठूलो हलचल ल्याउने निश्चित छ।

विशेषगरी जनकपुर र कर्णालीका लागि हार अब थप समस्याको संकेत बन्नेछ भने शीर्ष स्थानमै बसेका विराटनगर र सुदूरपश्चिमले आफ्नो बढ्दो दबदबा कायम राख्नुभनेर मैदान उत्रिनेछन्।