प्रधानमन्त्रीको सचिवालयद्वारा नियुक्ति विवादमा दियो जवाफ, गलत प्रचार भन्दै खण्डन

Prime TV News १ हप्ता अगाडि

काठमाडौ । प्रधानमन्त्री सुशीला कार्कीको सचिवालयले प्रमुख स्वकीय सचिव आदर्श कुमार श्रेष्ठको नियुक्ति सम्बन्धमा फैलिएको विवादमा जवाफ दिएको छ। केही सञ्चार माध्यम र सामाजिक सञ्जालमा श्रेष्ठले परिवारका सदस्य र नातेदारलाई नियुक्त गरेको भन्ने आरोप चलेको छ । 

प्रधानमन्त्री सचिवालयले सोमबार जारी गरेको विज्ञप्तिमा यसलाई अनावश्यक लाञ्छना र गलत प्रचार भन्दै खण्डन गरेको छ। विज्ञप्तिमा भनिएको छ, “प्रधानमन्त्रीको निवासमा रही नजिकबाट सहयोग गर्नुपर्ने र चौबीसै घण्टा साथमा खट्नुपर्ने भएकाले सुरक्षाका कारण भरोसायोग्य र कानुनसम्मत व्यक्तिलाई नियुक्त गर्नु आवश्यक हुन्छ। यसबाहेक अन्य नियुक्तिहरुमा प्रमुख स्वकीय सचिवलाई अनावश्यक रुपमा लाञ्छना लगाएर प्रचार नगरिदिन अनुरोध छ।”

सचिवालयले मितव्ययिता, पारदर्शिता र जवाफदेहिताको पक्षमा जिम्मेवार र संवेदनशील व्यवहार गर्दै आएको पनि विज्ञप्तिमा उल्लेख छ। सचिवालयको संरचना सम्बन्धमा तथ्याङ्क दिँदै विज्ञप्तिमा भनिएको छ कि सल्लाहकारको ७ दरबन्दीमध्ये हाल २ मात्रै कार्यरत छन्।

१९ विज्ञ कर्मचारीको दरबन्दीमा ४ मात्रै कार्यरत छन्, जसमध्ये एक अवैतनिक छन्। स्वकीय सचिवालयमा ४१ दरबन्दी भए पनि १४ मात्र कार्यरत रहेको बताइएको छ । यसरी कुल ६७ दरबन्दीमध्ये हाल २० जनाले मात्रै सचिवालय सञ्चालन गरिरहेको प्रधानमन्त्री सचिवालयले जनाएको छ ।