भारतको पिटिसी कम्पनीसँग विद्युत खरिद सम्झौताले नेपाललाई कुनै घाटा छैनः मन्त्री घिसिङ

Prime TV News एक महिना अगाडि

काठमाडौ । ऊर्जा, जलस्रोत तथा सिँचाइ, भौतिक पूर्वाधार तथा यातायात तथा सहरी विकासमन्त्री कुलमान घिसिङले भारतको पिटिसी कम्पनीसँग विद्युत खरिद सम्झौता गरेर नेपाललाई कुनै घाटा नरहेको बताएका छन् ।

सोमबार सिंहदरबारमा बसेको राष्ट्रियसभा अन्तर्गतको सार्वजनिक नीति तथा प्रत्यायोजित विधायन समितिको बैठकमा मन्त्री घिसिङले प्रतियुनिट ६ रूपैयाँ ९५ पैसामा विधुत खरिद सम्झौता गरेर घाटा नभइ फाइदा भएको भन्दै ४३ करोड घाटा भयो भनेर गरिएको प्रचारबाजीमा सत्यता नरहेको बताए ।

उनले अहिलको विद्युत खरिद सम्झौता गरेर विद्युत प्राधिकरणलाई एक अर्ब २० करोड बचाएको दावी समेत गरे । पिटिसी कम्पनीसंग विद्युत खरिद सम्झौता नभएको भए ८ रुपैया १० पैसामा विद्युत खरिद गर्ने अवस्था रहेको मन्त्री घिसिङको भनाई छ ।

घिसिङले अहिलको सम्झौताले राज्यलाई नाफाका साथै सुख्खा मौसममा उद्योगीहरुलाई थप विधुत दिन सक्ने वातावरण बनेको पनि जिकिर गरे । त्यस्तै मन्त्री घिसिङले सरकारी बजेट रोक्का भएका कारण चालु आर्थिक वर्षको पहिलो त्रैमासिकमा विकास खर्च कम देखिएको बताए ।

रोक्का भएको बजेट घटाएर हेर्ने हो भने प्रगति प्रतिशत २० प्रतिशतभन्दा माथि पुग्ने उनले बताए । बजेट रोक्कापछिको दोस्रो ठूला अवरोध जेनजी आन्दोलन र विभिन्न परियोजनास्थलमा काम बन्द हुनु रहेको भन्दै मन्त्री घिसिङले समयमा काम नगर्ने निर्माण व्यवसायीलाई  कडाइका साथ कारबाही थालिएको भन्दै दुई सय ६९ परियोजना ठेक्का तोड्ने प्रक्रियामा रहेको र ४९ ठेक्का आधिकारिक रूपमा तोडिएको जानकारी दिए ।

पुनर्निर्माणका संरचनाको डिजाइन तथा निर्माण प्रक्रिया तीव्र गतिमा अघि बढिरहेको उहाले बताउनुभयो । बैठकमा समिति सदस्यहरुले विद्युत खरिद सम्झौता, पुननिर्माण र विकास खर्चका बारेमा चासो राखेका थिए ।