देउवाले शिक्षा विधेयक टुङ्ग्याउन चाहेनन्, प्रधानमन्त्री ओली फर्किएपछिमात्रै टुङ्गिने

Prime TV News एक महिना अगाडि

काठमाडौं, १७ असार । नेपाली कांग्रेसका प्रचार विभाग प्रमुख मिन विश्वकर्माले प्रधानमन्त्री केपी शर्मा ओली नेपाल फर्किएपछि शिक्षा विधेयक निष्कर्षमा पुग्ने बताएका छन् । नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले शिक्षा विधेयकको सन्दर्भमा नेपाल शिक्षक महासंघ र सरकारबीच केही असमझदारी रहेको बताए । हिजो शिक्षामन्त्री र महासंघका प्रतिनिधिबीच कुरा नमिलेको उनले बताए । नेता विश्वकर्माले शिक्षामन्त्री रघुजी पन्तले विधेयक पास गरौं भन्ने प्रस्ताव गर्दा पनि कांग्रेस सभापति शेरबहादुर देउवाले फेरि शिक्षकहरु आन्दोलनमा आउने गरी पारित गर्न नहुने बताएर रोकेको बताए ।

‘आन्दोलनरत शिक्षकहरुको भावनालाई समेटेर, मागहरुलाई समेटेर ल्याउँछौं भनेकोमा अहिले प्रस्तुत विधेयकमा निष्कर्षको चरणमा पुग्दा आन्तरिक र बाह्यबाट ६० र मूल्याङ्कनको अंकको बारेमा पनि उहाँहरुको बिमती रह्यो । विमती रहेर उहाँहरु बैठकबाटै उठेर हिँड्नुभयो । उठेर हिँडेपछि शिक्षामन्त्री आत्तिनुभयो । के गर्ने भनेर सोध्न कांग्रेस सभापति र उपसभापतिलाई भेट्नै आउनुभयो । छलफल गर्दै जाँदा उहाँले के भन्नुभयो– शिक्षकहरु आन्दोलन गर्दैनन् । म मिलाउँछु र यो विधेयक पास गरौं भन्दा होइन, उहाँहरुको चित्त दुखाएर फेरि आन्दोलन हुने ढंगबाट विधेयक लान हुँदैन,’– विश्वकर्माले भने ।

साथै, अब प्रधानमन्त्री केपी शर्मा ओली नेपाल फर्किएपछि विधेयकले निष्कर्षमा पुग्ने उनले बताए । प्रधानमन्त्री ओली र कांग्रेस सभापति देउवा बसेर विधेयकलाई अन्तिम रुप दिने उनको भनाइ छ । ‘त्यसलाई उच्चस्तरमा छलफल गर्ने, उच्चस्तर भनेको कांग्रेसबाट शेरबहादुर देउवा हुनुहुन्छ । एमालेबाट केपी शर्मा ओली हुनुहुन्छ । केपी शर्मा ओली दुई दिनपछि नेपाल फर्किँदै हुनुहुन्छ । छलफल गरौं, सल्लाह गरौं, बरु दुई दिन लम्बियोस् । तर राम्रो आयोस् भन्नु परिपक्वता हो । जवाफदेहिता हो,’– उनले भने ।