आयोगमा दल दर्ता गर्दैमा निर्वाचन हुन्छ भन्ने छैनः एमाले महासचिव पोखरेल

Prime TV News ४ दिन अगाडि

काठमाडौ । नेकपा एमालेका महासचिव शंकर पोखरेलले फागुन २१ गतेको प्रतिनिधि सभा निर्वाचनको सुनिश्चितता बारे शंका व्यक्त गरेका छन्। उनले सामाजिक सञ्जालमा लेख्दै राजनीतिक दलहरू निर्वाचन आयोगमा दर्ता गरिँदैमा आगामी निर्वाचन अनिवार्य रूपले हुने भन्ने भनाइलाई भ्रम फैलाउने काम भएको बताएका छन् । 

पोखरेलले वर्तमान राजनीतिक अवस्थाबारे टिप्पणी गर्दै भने, "दल दर्ताको प्रक्रिया निर्वाचनको सुनिश्चितता होइन। यसले कुनै पनि खालको चुनावी वातावरण निर्माण गरेको छैन। वर्तमान सरकार न त निर्वाचनका लागि कदम चालेको छ, न त यसका लागि कुनै वातावरण तयार गरेको छ," ।

उनले आगामी माघ ११ गतेको राष्ट्रिय सभा र फागुन २१ का लागि तोकिएको प्रतिनिधि सभा निर्वाचनका लागि दलहरूको दर्ता प्रक्रिया एमालेको केन्द्रीय कमिटीको निर्णयअनुसार सम्पन्न भएको बताउँदै, यसलाई आधार बनाउँदै चुनाव सुनिश्चित भएको दाबी गर्नु भ्रमपूर्ण भएको चेतावनी दिए। "यो प्रक्रिया मात्रै निर्वाचनको ग्यारेन्टी बन्न सक्दैन," उनले थपे।

महासचिव पोखरेलले सुशीला कार्कीको नेतृत्वमा रहेको अन्तरिम सरकार र प्रतिनिधि सभा विघटनलाई असंवैधानिक ठहर गर्दै सर्वोच्च अदालतमा यसको संवैधानिक परीक्षण आवश्यक रहेको तर्क गरे। पोखरेलले सरकारको हालको कामकाजलाई आलोचना गर्दै भने, "सरकारका कदमहरूले राजनीतिक दलहरूको गतिविधि रोक्ने र नवयुवाहरूसम्मलाई निरुत्साहित गर्ने काम गरेका छन्। यसका साथै, यसले समाजमा अराजकता र भय सिर्जना गर्न प्रभाव पारिरहेको छ।"