‘अभिमन्युः च्याप्टर १’को हिन्दी टिजर सार्वजनिक, दुई भाषामा विश्वव्यापी रिलिजको तयारी

Prime TV News ४ दिन अगाडि

काठमाडौ । आगामी मंसिर १८ गतेदेखि सार्वजनिक प्रदर्शनमा आउन तयारी भइरहेको नेपाली सिनेमा ‘अभिमन्युः च्याप्टर १’ ले आफ्नो हिन्दी भर्सनको टिजर सार्वजनिक गर्दै प्रचार–प्रसारलाई थप तीव्रता दिएको छ। सिनेमा नेपाली मात्र होइन, हिन्दी भाषामा समेत नेपाल, भारत तथा विभिन्न अन्तर्राष्ट्रिय बजारमा एकसाथ रिलिज हुने भएकाले निर्माण पक्षले ओभरसिज दर्शकलाई लक्षित गर्दै हिन्दी टिजर अघि सारेको हो।

करिब एक मिनेटको टिजरमा प्रेम, सस्पेन्स, पैसाको मोह, अपहरण, सेयर विवाद, प्रहरी हिरासत र आरोपीको बयानसम्मका दृश्यहरू छिटो छरितो तरिकाले समावेश गरिएका छन्। मुख्य पात्र कसरी सामान्य जीवनबाट अपहरणकारीमा रूपान्तरण हुन्छ भन्ने गहिरो रहस्य फिल्मको मुख्य रेखा रहेको टिजरले झल्काएको छ।

सेभेन सिज सिनेमाजको ब्यानरमा निर्माण भएको यस सिनेमामा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल र शिशिर वाङ्देल प्रमुख भूमिकामा देखिनेछन्। निर्देशनको जिम्मेवारी सुशान्त गौतमले सम्हालेका छन्।

निर्माण पक्षका अनुसार फिल्मलाई दुई भाषामा निर्माण र वितरण गर्ने निर्णयले भारतीय बजार तथा विश्वभर रहेका नेपाली दर्शकसमेतलाई लक्षित गरिएको छ। टिजर सार्वजनिक भएपछि दर्शकबीच फिल्मको विषयवस्तु, विशेषगरी अपहरण तथा मनोवैज्ञानिक सस्पेन्सका तत्वप्रति चासो बढेको देखिएको छ। ‘अभिमन्युः च्याप्टर १’ को प्रदर्शन मंसिर १८ मा हुने तय भइसकेको छ र फिल्मले वर्ष अन्त्यमा नेपाली फिल्म उद्योगमा नयाँ अनुभव ल्याउने अपेक्षा गरिएको छ।