बिहीबार बिहान काठमाडौंसहित केही क्षेत्रमा आंशिक बदली, वर्षाको संभावना न्यून

Prime TV News एक महिना अगाडि

काठमाडौ । बिहीबार बिहान नेपालका केही भूभागमा आंशिक बदली छाएको छ। मौसम पूर्वानुमान महाशाखाका अनुसार कोसी, मधेस, वाग्मती, गण्डकी र लुम्बिनी प्रदेशमा आकाश आंशिक रूपमा ढाकिएको छ भने बाँकी भूभागमा मौसम सामान्यतया सफा रहेको छ।

पर्यावरण एवं मौसमविद्का अनुसार दक्षिण भारतको तटीय क्षेत्रमा सक्रिय ‘सेन्यार’ नामक चक्रवातका केही बाहिरी भाग उत्तरतिर हिमालय क्षेत्रसम्म फैलिन पुगेको छ । उच्च वायुमण्डलीय तहमा चिसिँदै फैलिँदा आज हल्का–फुल्का बादल देखिएको हो ।

इथियोपियामा भएको ज्वालामुखी विस्फोटसँग नेपालको आकाशमा देखिएको बादलको कुनै सम्बन्ध नरहेको पनि मौसमविद्ले स्पष्ट पारेका छन्। आगामी तीन दिन मौसम सामान्यतया खुला रहने र वर्षाको कुनै सम्भावना नरहेको पनि जनाइएको छ ।

आज मध्याह्नपछि मौसम क्रमशः खुल्दै जाने अनुमान गरिएको छ। काठमाडौंमा बिहीबार बिहान पौने ९ बजे न्यूनतम तापक्रम ७.४ डिग्री सेल्सियस मापन भएको छ। बुधबार ६.१ डिग्री र मंगलबार ७ डिग्री मापन भएको थियो।