नेप्से परिसूचक साताको अन्तिम दिन बढेर बन्द

Prime TV News ३ दिन अगाडि

काठमाडौ । साताको अन्तिम कारोबार दिन बिहीबार नेप्से परिसूचक १०.४३ अंकले बढेर २६७६.०३ विन्दुमा पुगेको छ। साताको पहिलो दिनदेखि बढेको सकारात्मक प्रवृत्ति यस दिन पनि कायम रह्यो।

यस दिन सेन्सेटिभ इण्डेक्स २.४८ अंक, फ्लोट इण्डेक्स १.१४ अंक र सेन्सेटिभ फ्लोट इण्डेक्स १.२१ अंकले बढेको छ। तर, बजारमा कारोबार रकम सामान्य घटेको छ। ३३३ स्टकको ८६ हजार १७० पटकको कारोबारमा ६ अर्ब ६६ करोड २३ लाख ८३ हजार रुपैयाँ बराबरको १ करोड ४६ लाख ९३ हजार कित्ता शेयर किनबेच भएको छ।

यस दिन सागर डिष्टिलरी, स्वस्तिक लघुवित्त, झापा इनर्जी र श्रीनगर एग्रीटेक इन्डष्ट्रीजका शेयर सकारात्मक सर्किट लेभलमा कारोबार भएका छन्। एनआरएन इन्फ्रास्ट्रक्चर एण्ड डेभलपमेन्टको शेयर मूल्य ९.५ प्रतिशतभन्दा बढी बढेको छ भने हिमाल दोलखा हाइड्रोपावरको शेयर करिब ६ प्रतिशतले बढेको छ।

अर्कोतर्फ, हिमस्टार उर्जा र फस्ट माइक्रोफाइनान्स लघुवित्तका शेयर मूल्य सर्वाधिक ७.७८ प्रतिशत घटेका छन्। कारोबार रकमको आधारमा एनआरएन इन्फ्रास्ट्रक्चर एण्ड डेभलपमेन्ट शीर्ष स्थानमा रहेको छ, जसको ४० करोड १७ लाख रुपैयाँबराबरको शेयर किनबेच भएको छ। १३ उपसमूहमध्ये ८ उपसमूहको परिसूचक बढेको छ भने ५ उपसमूहको परिसूचक घटेको छ।

यस दिन बैंकिङ्ग उपसमूहको परिसूचक सर्वाधिक १.४७ प्रतिशतले बढेको छ। वित्त, उत्पादन तथा प्रशोधन, लघुवित्त, अन्य र व्यापार उपसमूहको परिसूचक भने सामान्य घटेको छ।