पुनः द्वन्द्व दोहोरिने किसिमका विषय काबुमै राख्न सफल भएको गृहमन्त्री अर्यालको दावी

Prime TV News ३ दिन अगाडि

काठमाडौ । गृहमन्त्री ओमप्रकाश अर्यालले पुनः द्वन्द्व दोहोरिने किसिमका विषय काबुमै राख्न सफल भएको बताएका छन् ।

राष्ट्रियसभाको सार्वजनिक नीति तथा प्रत्यायोजित विधायन समितिको बिहीबारको बैठकमा उनले आगामी प्रतिनिधिसभा निर्वाचनको वातावरण बनाउन सरकारले तीव्र गतिमा काम गरिरहेको बताए । “देशको विद्यमान कानुन जे छ त्यो शासन मुताबिक यथावत रूपमा चल्नुपर्छ,” उनले भन्नुभयो, “द्वन्द्व दोहोरिने कुरा धेरै हदसम्म हामीले अहिले काबुभित्र राखेका छौँ ।”

उनले त्यसका लागि राजनीतिक दल र 'जेनजी' समूहबीच संवाद चलिरहेको जानकारी दिए । मन्त्री अर्यालले निर्वाचन निष्पक्ष र शान्तिपूर्ण बनाउन सरकार प्रतिबद्ध रहेको बताए । लुटिएका हतियार र फरार कैदीबन्दीको व्यवस्थापन प्रभावकारी रूपमा भइरहेको उनको भनाइ छ । प्रहरीको मनोबल बढाउने र क्षतिग्रस्त कार्यालयको पुनर्निर्माणमा नागरिक सहयोग प्राप्त भएको अर्यालको भनाइ छ । जनताले सुरक्षित वातावरणमा मतदान गर्न पाउने उनले विश्वास व्यक्त गरे ।

विभिन्न समूहले विविध माग राखी प्रदर्शन, धर्ना, जुलुस र विरोधलगायतका कार्यक्रम गरिरहेको भन्दै मन्त्री अर्यालले त्यस्ता गतिविधिको सूक्ष्म निगरानी र समन्वयात्मक रूपमा प्रभावकारी सुरक्षा व्यवस्था मिलाइएको समितिलाई जानकारी दिए ।“सुरक्षा निकायबाट परिचालन हुने कर्मचारीलाई आवश्यक बन्दोबस्तका सामान खरिद व्यवस्थापन भइरहेको छ,” उनले भने ।

'जेनजी' आन्दोलनपश्चात् विकसित घटनाक्रम र परिवर्तनसँगै समाजमा घट्ने र घट्न सक्ने उछृङ्खल गतिविधि भएमा वा समस्या परेमा सोको सहजीकरण गर्न सहायता कक्ष स्थापना गरिएको उनको भनाइ छ । हेल्प डेस्क नम्बर ९८५१३६०६०३ मा फोन गर्न सकिने उनले बताए ।

मन्त्री अर्यालले आगामी प्रतिनिधिसभा निर्वाचनलाई लक्षित गर्दै तथा देशको समग्र शान्ति सुरक्षालाई ध्यानमा राखी हालसम्म चार पटक केन्द्रीय सुरक्षा समितिको बैठक बसी निर्वाचन सुरक्षा रणनीति निर्माणलगायतका जम्मा २० वटा निर्णय गरिएको बताए । उनका अनुसार आगामी निर्वाचनलाई लक्षित गरी म्यादी प्रहरी भर्ना गर्ने योजना अघि बढाइएको छ । रासस