पूर्व सांसद गंगा थारुमाथि स्थानीय महिलाद्वारा कुटपिट

Prime TV News २ दिन अगाडि

दाङ । राप्ती गाउँपालिका–७ मा बाटो सम्बन्धी विवादले उग्र रूप लिँदा पूर्व सांसद गंगा थारु कुटिइएकी छन्। गाउँमै भएको छलफलका क्रममा वादविवाद चर्किएपछि घटनाले हिंसात्मक रूप लिएको बताइएको छ । 

छलफलका बीचमा गंगा थारु एक महिलासँग तनाबपूर्ण बहसमा उत्रिएपछि अन्य महिलाहरू समूहमा झम्पिएर उनलाई लछारपछार गर्दै कुटपिट गरेको प्रारम्भिक विवरण आएको छ। घटनापछि गंगाको घुँडामा चोट लागेको छ भने उनका अनुसार मंगलसूत्रसमेत हराएको छ।

गंगाले आफूलाई कुटपिट गर्नेहरूलाई कानुन अनुसार कारबाही गर्न माग गर्दै प्रहरीमा उजुरी दर्ता गरेकी छन्। उनी हाल राजावादी आन्दोलनमा सक्रिय छन् भने विगतमा थरुहट पार्टी र एमाले हुँदै विभिन्न राजनीतिक गतिविधिमा संलग्न रहिआएकी थिइन्।

उनले घटनापछि प्रहरीसमक्ष दिएको बयानमा भनिन्, “मलाई माओवादी कार्यकर्ताले कुटेका हुन्, सबै चिनिएका अनुहार थिए। बाटोको समस्या मिलाउन गएकी थिएँ, तर उल्टै हातपात भयो।”

दुवै पक्षबाट प्रहरीमा ठाडो उजुरी परेको छ र अनुसन्धान अघि बढाइएको छ।