ओलीकै लिखित सिफारिस र सहमतिमा अन्तरिम सरकार गठन गरिएको हो: राष्ट्रपति पौडेल
Prime TV News २ दिन अगाडि 
काठमाडौ । राष्ट्रपति रामचन्द्र पौडेलले सुशीला कार्की नेतृत्वमा भदौ २७ गते गठन भएको अन्तरिम सरकार संविधानसम्मत र परिस्थितिले बाध्य बनाएर गरिएको निर्णय भएको बताएका छन्।
प्रतिनिधिसभा विघटन र अन्तरिम सरकार गठनविरुद्ध परेका रिटका लागि सर्वोच्च अदालतमा पेश गरिएको लिखित जवाफमा उनले त्यतिबेलाको राजनीतिक अस्थिरता र जेनजी आन्दोलनको तीव्रताले देशलाई संवैधानिक रिक्ततामा धकेल्दै लगेपछि तत्काल कदम चाल्नु अपरिहार्य भएको उल्लेख गरेका छन्।
राष्ट्रपतिले तत्कालीन प्रधानमन्त्री केपी शर्मा ओलीले भदौ २४ गते राजीनामा दिएपछि मुलुक असहज मोडमा पुगेको र उपलब्ध संवैधानिक विकल्पहरू सक्रिय हुन नसक्ने स्थिति बनेको दाबी गरेका छन्।
उनले ओलीकै लिखित सिफारिस र सहमतिमा राष्ट्रिय एकता, संविधानको संरक्षण र संवैधानिक स्थायित्वका लागि अन्तरिम सरकार गठन गरिएको समेत बताएका छन् ।
जवाफमा राष्ट्रपति पौडेलले अन्तरिम सरकारलाई ६ महिनाभित्र नयाँ प्रतिनिधिसभाको निर्वाचन गराउने जिम्मेवारी दिइएको स्पष्ट पारेका छन्। संविधानले राष्ट्रपतिलाई असामान्य अवस्थालाई सम्बोधन गर्ने जिम्मेवारी दिएको भन्दै उनले आफ्नो निर्णय संविधानकै मर्मअनुरूप भएको जिकिर गरेका छन्। राष्ट्रपतिले सर्वोच्च अदालतका विगतका दुई फैसलाको उदाहरण दिँदै असामान्य परिस्थितिमा सामान्य संवैधानिक प्रक्रिया पूरा गर्न कठिन हुने भएकाले आवश्यकताको सिद्धान्त लागू हुने बताएका छन्। एमालेले दायर गरेको प्रतिनिधिसभा विघटनसम्बन्धी रिटको सुनुवाइ मंसिर १७ गते निर्धारण गरिएको छ।
