पार्टीको अस्तित्व जोगाउने अन्तिम मौका: एमाले सचिव विष्ट

Prime TV News एक दिन अगाडि

काठमाडौ । नेकपा एमालेका सचिव गोकर्ण विष्टले आसन्न महाधिवेशनलाई पार्टीको अस्तित्व जोगाउने अन्तिम मौका भन्दै प्रतिनिधि चयनमा कार्यकर्तालाई कठोर रूपमा सचेत गराएका छन्।

मंसिर २७ गते सुरु हुने महाधिवेशनको तयारीसहित देशभर प्रतिनिधि चयन भइरहेकै बेला विष्टले पार्टीको अहिलेको स्थिति विषम मात्र होइन, आत्मघाती मोडतिर चिप्लिरहेको समेत बताए।

उनले एमालेले विगत वर्षहरूमा संचित गरेको जनविश्वास तीव्र रूपमा खुम्चिँदै गएको र नेतृत्व परिवर्तनबिना त्यो विश्वास नफर्किने बताए ।

विष्टले भने, “देशमा देखिएको अवस्था कुनै सामान्य आँधी होइन, गहिरो अन्धकार हो। पार्टीलाई बलियो, एकीकृत र जनताका अपेक्षासँग मेल खाने बाटोतिर नबढायो भने क्षति भयङ्कर हुनेछ। प्रतिनिधिहरूले जिम्मेवारी बिर्सिए भने महाधिवेशन औपचारिकता मात्रै बन्छ।”

उनले पार्टीभित्र चल्दै आएको मनोमानी, व्यक्तिगत नियन्त्रण र संगठनात्मक कमजोरीले एमालेलाई भित्रैदेखि खिइरहेको आरोप पनि समेत बताएका छन् ।