सुदूरपश्चिम रोयल्स एनपीएलको प्लेअफ प्रवेश गर्ने पहिलो टोली
Prime TV News एक दिन अगाडि 
काठमाडौ । सुदूरपश्चिम रोयल्स नेपालको प्रिमियर क्रिकेट लिग एनपीएल–२ मा प्लेअफ प्रवेश गर्ने पहिलो टोली भएको छ। पाँच खेलमा पाँचै जित दर्ता गर्दै उनीहरूले यो लिगमा शक्तिशाली भएको प्रमाणित गरे ।
शनिबार कीर्तिपुरस्थित त्रिवि अन्तर्राष्ट्रिय क्रिकेट रङ्गशालामा साविक विजेता जनकपुर बोल्ट्सलाई हराउँदै सुदूरपश्चिमले प्लेअफ यात्रा सुनिश्चित गर्यो। जनकपुरले दिएको १४६ रनको लक्ष्यलाई सुदूरपश्चिमले खेल सकिनु १४ बल अघि नै चार विकेट गुमाएर सजिलै भेट्टायो। जनकपुरको प्रदर्शन भने कमजोर र अस्थिर रह्यो ।
सुदूरपश्चिमका इशान पाण्डेले ५६ रन बनाउँदै टोलीको जीतको बाटो प्रशस्त गरे। ३५ बलमा ८ चौका र एक छक्का प्रहार गर्दै उनले दरो सुरुवात दिए। विनोद भण्डारीले ४२ रनको योगदान दिए, जसले पारीलाई थप स्थिरता दियो।
बलिङतर्फ जनकपुरका माज शदाकतले दुई विकेट लिए, तर उनको प्रयास टोलीलाई जोगाउन पर्याप्त रहेन। सञ्जय कृष्णमुर्ती र आदित्य महताले एक–एक विकेट लिए ।
यसअघि टस जितेर जनकपुरले पहिलो ब्याटिङ गर्दै २० ओभरमा ८ विकेट गुमाएर १४५ रनको साधारण योगफल बनायो। जनकपुरका तर्फबाट सञ्जय कृष्णमुर्तीले ३८ बलमा अर्धशतक प्रहार गरे। यान निकोल लफ्टी इटनले ३९ रन जोडे, तर अरू ब्याटरहरूले भने निराशाजनक प्रदर्शन गरे।
सुदूरपश्चिमका बलर अभिनाश बोहरा एक्लैले चार विकेट लिए। स्कट कुगलाइनले तीन र दीपेन्द्रसिंह ऐरीले एक विकेट लिए ।
