गाजामा मृतक संख्या ७० हजार नाघ्यो, युद्धविरामपछि पनि आक्रमण रोकिएन
Prime TV News १८ घण्टा अगाडि 
काठमाडौ । गाजामा इजरायली आक्रमणका कारण मृतक संख्या ७० हजार नाघेको स्वास्थ्य अधिकारीहरूले पुष्टि गरेका छन्।
हमासद्वारा सञ्चालित गाजा स्वास्थ्य मन्त्रालयका अनुसार हालसम्म ७० हजार १ सय प्यालेस्टिनी मारिएका छन्। मन्त्रालयले युद्धविराम लागू भएको पछिल्ला सात दिनमै ३ सय ५० भन्दा बढी नागरिकको ज्यान गएको जनाएको छ।
सन् २०२३ अक्टोबर ७ मा हमासले दक्षिणी इजरायलमा हमला गरेपछि शुरुभएको युद्ध अहिलेसम्म थामिन नसकेको हो। त्यतिबेला हमासको आक्रमणमा १ हजार २ सय इजरायली मारिएका थिए भने २५१ जनालाई बन्धक बनाएर गाजा लगिएको थियो। ती बन्धकमध्ये नेपाली युवक विपिन जोशीको मृत्यु भएको केही हप्ता अघि पुष्टि गरिएको थियो।
गत अक्टोबर १० देखि अस्थायी युद्धविराम लागू गरिए पनि दुवै पक्ष आक्रमण रोक्न असफल भएका छन्। एकअर्कामाथि युद्धविराम उल्लंघनको आरोप लगातार चलिरहेको छ। इजरायलले हमासले शर्त तोडेको भन्दै “जवाफी कारबाही”का नाममा हवाई तथा ड्रोन आक्रमण जारी राखेको दाबी गरेको छ। शनिबार पनि इजरायली सेनाले गाजाको उत्तर क्षेत्रमा ड्रोन हमला गरेको मन्त्रालयले जनाएको छ। लगातारका आक्रमणले अस्पताल, विद्युत्, खानेपानी र आश्रयस्थल जस्तै आधारभूत संरचना गम्भीर रूपमा ध्वस्त भएका छन्। मानवअधिकार समूहहरूले गाजाको अवस्था ‘अतिनै भयावह मानवीय संकट’मा परिणत भएको भन्दै युद्ध रोक्न दुवै पक्षलाई दबाब दिन अन्तर्राष्ट्रिय समुदायलाई आग्रह गरेका छन्। अविराम हिंसाका कारण गाजामा उद्धार, उपचार र राहत वितरण कार्य अत्यन्तै कठिन बन्दै गएको अधिकारीहरूको भनाइ छ।
