जेनजी अगुवा रक्षा बमको चेतावनी: विवादित प्रत्यक्ष कार्यकारी ड्राफ्ट अलोकतान्त्रिक र खतरनाक

Prime TV News १६ घण्टा अगाडि

काठमाडौ । जेनजी आन्दोलनकी अगुवा रक्षा बमले प्रत्यक्ष निर्वाचित कार्यकारी प्रणाली र तत्काल संविधान संशोधन प्रस्ताव समेटिएको विवादित ‘ड्राफ्ट’लाई अलोकतान्त्रिक र खतरनाक हस्तक्षेप भएको बताएकी छिन्।

आइतबार फेसबुकमा लेख्दै बमले भनेकी छन् कि विगत केही सातायता स्वार्थ समूहद्वारा तयार पारिएको भनिएको ड्राफ्ट संवेदनशील विषयलाई दबाबमार्फत अघि बढाउने प्रयास हो, जुन अस्वीकार्य छ। उनले संविधान संशोधनजस्ता मुद्दा अघि बढाउन जनताको स्पष्ट म्यान्डेट आवश्यक रहेको बताईन् ।

बमले लेखेकी छन्,“हामी संविधान पुनरावलोकनको पक्षमा छौँ, तर त्यसका लागि जनताको सहमति अपरिहार्य छ।” बमले प्रत्यक्ष कार्यकारी प्रणाली जस्ता विषय अघि सार्न चाहनेहरूले चुनावी घोषणापत्रमार्फत जनतासामु लैजानु पर्ने बताएकी छिन्। उनले भनिन्, “संक्रमणको यस्तो बेला संविधानका मूल मर्ममा प्रहार गर्ने खेल स्वीकार्य छैन।

देश जादुको छडीले चल्दैन, यसको लागि विधि शासन, लोकतान्त्रिक मूल्य र जनसहभागिता अनिवार्य छ।” बमले संविधान पुनरावलोकनको पक्षमा भए पनि यसका लागि व्यापक बहस र जनादेश अनिवार्य रहेको बताएकी छन्। उनले संविधान संशोधन वा प्रत्यक्ष निर्वाचित प्रणाली जस्ता विषयमा इच्छुक समूहले चुनावी घोषणापत्रमा उल्लेख गरी जनताबाट म्यान्डेट लिनु लोकतान्त्रिक मार्ग भएको उल्लेख गरेकी छन् ।