एनआरएनमा ऐतिहासिक एकता: महेश श्रेष्ठ र डा. बद्री केसीबीच सहमति

Prime TV News १४ घण्टा अगाडि

काठमाडौ । गैरआवासीय नेपाली संघमा लामो समयदेखि चलेको विभाजन अन्त्य गर्दै आज ऐतिहासिक एकताको सहमति भएको छ।

प्रधानमन्त्री सुशीला कार्कीको उपस्थितिमा महेश श्रेष्ठ र डा. बद्री केसीले एकता सम्बन्धी सहमति पत्रमा हस्ताक्षर गरेका छन्। पछिल्ला केही वर्षदेखि श्रेष्ठ र केसीको नेतृत्वमा क्रियाशील एनआरएनले मुलुकको बदलिएको परिस्थितिमा दुवै पक्षले दश बुँदे सहमति गर्दै एकताबद्ध हुने निर्णय गरेका छन्।

सहमति अनुसार, दुवै पक्षले १७ अप्रिल २०२६ भित्र १२औं महाधिवेशन सम्पन्न गर्ने र केसी नेतृत्वको कार्यसमितिले श्रेष्ठको नेतृत्वमा एकता महाधिवेशनमा जाने तयारी गरेको छ। महाधिवेशन पारदर्शी र विश्वासिलो बनाउन ११ सदस्यीय स्टेयरिङ कमिटी गठन गरिने र त्यसका सदस्यले उम्मेदवार नहुने सहमति भएको छ।

सहमति अनुसार, विभिन्न समयमा एनआरएनको आधिकारिकता सम्बन्धी अदालतमा दायर मुद्दा फिर्ता लिइने र आर्थिक गतिविधि स्वतन्त्र तृतीय पक्षबाट अडिट गरिने व्यवस्था मिलाइएको छ। मुख्य बुँदाहरूमा २०२३ को ११औं महाधिवेशनबाट निर्वाचित डा. बद्री केसीको कार्यसमितिलाई र २०२५ को एकता महाधिवेशनबाट निर्वाचित महेशकुमार श्रेष्ठको कार्यसमितिलाई मान्यता दिने व्यवस्था छ।

साथै, १२औं महाधिवेशन पूरा भएपछि श्रेष्ठको नेतृत्वको समिति पूर्ण कार्यकालको रूपमा मानिने छ। पूर्व अध्यक्षहरूद्वारा सञ्चालित विभिन्न कार्यसमितिहरू अभिलेखीकरण गरिने, र महाधिवेशनको प्रतिवेदन अध्यक्षद्वारा हस्तान्तरण गरिने व्यवस्था पनि सहमति पत्रमा समेटिएको छ। सहमति पत्रमा हस्ताक्षरकर्ता ११औं महाधिवेशनका अध्यक्ष डा. बद्री केसी र एकता महाधिवेशनबाट निर्वाचित अध्यक्ष महेशकुमार श्रेष्ठ रहेका छन्।