युक्रेनले रूसी ट्यांकरहरूमा ड्रोन हमला गरेको दाबी

Prime TV News १३ घण्टा अगाडि

काठमाडौ । युक्रेनले ब्ल्याक सी हुँदै गइरहेका रूसी ‘छायाँ फ्लीट’सँग सम्बन्धित दुई तेल ट्यांकरहरूलाई नौसैनिक ड्रोनमार्फत हमला गरेको दावी गरेको छ।

युक्रेनी अधिकारीहरूले जानकारी दिएका छन् कि निशाना बनाइएका ट्यांकरहरू काइरोस र विराट हुन् । जसमा गाम्बियाको झण्डा फहराइएको थियो। टर्कीका अधिकारीका अनुसार, ट्यांकरहरू शुक्रबार टर्की तट नजिकै हमला भए र विराट ट्यांकरलाई शनिबार फेरि निशाना बनाइएको थियो।

यद्यपि, यस हमलामा कुनै हताहत नभएको बताइएको छ। चालक दलले ड्रोन हमला भएको सूचना दिँदै सहायता मागेका थिए। सार्वजनिक भिडियोमा पानीमा चल्ने ड्रोनहरू जहाजतर्फ बढ्दै ठोक्किएपछि विस्फोट र आगलागी देखिएको छ।

टर्कीको यातायात मन्त्रालयका अनुसार जहाजमा सामान्य मात्र क्षति भएको र चालक दल सुरक्षित रहेका छन्। युक्रेनी सुरक्षा सेवाका एक स्रोतका अनुसार, आधुनिकीकरण गरिएको ‘सी बेबी’ नौसैनिक ड्रोनले जहाजहरूलाई सफलतापूर्वक निशाना बनाएको थियो। यो घटनाले युक्रेनले रूसको तेल अर्थतन्त्रमा प्रहार गर्दै युद्ध जारी राख्ने प्रयास गरिरहेको देखाउँछ।