नीतिमा छलफल हुँदैन तर प्रतिस्पर्धा गर्न चाहनेलाई रोक्ने प्रयास हुदैनः एमाले अध्यक्ष ओली

Prime TV News १२ घण्टा अगाडि

काठमाडौ । नेकपा एमालेका अध्यक्ष केपी शर्मा ओलीले आसन्न ११औँ महाधिवेशनमा पार्टीको नीतिमा कुनै छलफल नहुने स्पष्ट पारेका छन्। वरिष्ठ उपाध्यक्ष ईश्वर पोखरेल सहितका नेताहरूले भदौ २३ र २४ को परिवर्तनपछि त्यो घटना समेतको वस्तुपरक समीक्षा हुनुपर्ने खाँचो औंल्याइरहेका बेला ओलीले छलफल नै नहुने बताएका हुन्।

महाधिवेशनको लोगो र नारा सार्वजनिक कार्यक्रममा उनले भने , “तीन महिनाअगाडि मात्रै विधान महाधिवेशनबाट नीतिमा छलफल गरिएको छ। संगठनको अवस्था, राजनीतिक प्रस्ताव र प्रतिवेदन समीक्षा भइसकेको छ। अहिले संगठनात्मक नीतिमा कुनै परिवर्तन आवश्यक छैन।”

उनले थपे, “यदि केही सानातिनो परिवर्तन आवश्यक भएमा महाधिवेशनले छोटो विधिबाट निर्णय गर्नेछ। यसमा लामो छलफल हुँदैन र कुनै असहमति राख्ने आवश्यकता छैन। महाधिवेशनले संगठनात्मक संरचना र नेतृत्व चयन गर्ने काम गर्नेछ।”

अध्यक्ष ओलीले राजनीतिक प्रतिवेदनमा कुनै हेरफेर गरिरहनुपर्ने अवस्था नरहेको बताएका छन्। तर ओलीले पार्टीको ११औँ महाधिवेशनमा निर्वाचन खुला हुने घोषणा गरेका छन्। उनले प्रतिस्पर्धा गर्न चाहनेलाई रोक्ने प्रयास नहुने बताएका हुन् । 

ओलीले भने, “महाधिवेशनमा मतदान हुनेछ। कसैले रोक्न सक्दैन। प्रतिस्पर्धा खुला हुनेछ र यो नराम्रो कुरा होइन। केन्द्रीय कमिटीका सदस्यहरूको लागि धेरै साथीहरूले इच्छुक हुनसक्छन्, त्यसमा कुनै रोक छैन।”