नेप्सेमा आज करेक्सन, कारोबार भने उत्साहजनक

Prime TV News १२ घण्टा अगाडि

काठमाडौ । पछिल्लो सातादेखि लगातार उकालो लागेको सेयर बजारमा आइतबार करेक्सन देखिएको छ। नेपाल स्टक एक्सचेन्ज (नेप्से) परिसूचक आज २६.५१ अंकले घटेर २६४९.५२ विन्दुमा बन्द भएको छ । जसले ०.९९ प्रतिशतको गिरावट देखाएको छ।

बजार घट्दा पनि कारोबार रकम उत्साहजनक नै देखिएको छ। आज कुल ७ अर्ब ८ करोड ५४ लाख ४९ हजार रुपैयाँ बराबरको सेयर खरिदबिक्री भएको छ। ३४२ वटा स्क्रिपमा ८४,१५६ पटकको कारोबार हुँदा १ करोड ५७ लाख ३६ हजार ३७२ कित्ता सेयर खरिदबिक्री भएको छ।

आज कारोबार भएका २५७ कम्पनीमध्ये २११ कम्पनीको मूल्य घटेको छ भने ४५ कम्पनीको मूल्य बढेको छ । एक कम्पनीको मूल्य स्थिर रहेको छ। बजार घट्दा पनि केही कम्पनीका लगानीकर्ताले नाफा कमाएका छन्। सागर डिस्टिलरी, निफ्राको ऋणपत्र, स्वस्तिक लघुवित्त, झापा इनर्जी र आत्मनिर्भर लघुवित्तको मूल्यमा सकारात्मक सर्किट लागेको छ।

सबैभन्दा धेरै गिरावट एनएमबि बैंकको डिबेञ्चरमा ८.९९ प्रतिशत देखिएको छ। क्षेत्रगत सूचकमा बैंकिङ र सातवटा अन्य सूचक एक प्रतिशतभन्दा बढी घटेका छन्। सबैभन्दा धेरै गिरावट लगानी समूहमा १.४८ प्रतिशत देखिएको छ।

कारोबार रकमको आधारमा हिमालयन रिइन्स्योरेन्स शीर्ष स्थानमा रह्यो, यस कम्पनीको कारोबार २३ करोड ५ लाख रुपैयाँ बराबरको भयो। जोशी हाइड्रोपावर, ग्रीन भेञ्चर र एनआरएन इन्फ्रास्ट्रक्चरमा पनि लगानीकर्ताको उच्च आकर्षण देखिएको छ।

बजारमा आज म्यानुप्याक्चरिङ र म्युचुअल फण्ड बाहेक सबै सूचक घटेका छन्। विशेषज्ञहरूले बजारको हल्का करेक्सनलाई स्वस्थ संकेत मान्दै लगानीकर्तालाई सतर्क रहन सुझाव दिएका छन्।