प्रतिनिधि सभा निर्वाचन : ७५ नयाँ मतदान स्थल थपिँदै, कुल मतदाता १.९ करोड पुग्ने

Prime TV News १० घण्टा अगाडि

काठमाडौ । आगामी फागुन २१ गते हुने प्रतिनिधि सभा निर्वाचनका लागि ७५ नयाँ मतदान स्थल थपिने भएका छन्।

मतदाता संख्या बढेसँगै निर्वाचन आयोगले देशभरका मतदान स्थल तथा केन्द्र पुनःव्यवस्थित गर्ने तयारी गरेको हो। २०७९ सालमा १ करोड ७९ लाख ८८ हजार ५७० मतदाता रहेका बेला १० हजार ८९२ मतदान स्थल र २२ हजार २२७ मतदान केन्द्र कायम गरिएको थियो।

यसपटक करिब ८ लाखभन्दा बढी मतदाता थपिएपछि मतदान स्थल विस्तार गर्नु आवश्यक भएको आयोगले जनाएको छ। आयोगका अनुसार, ७५ नयाँ मतदान स्थल थपिने निश्चित भएको छ भने ती स्थानमा आवश्यकताअनुसार दुब्बरदेखि तेब्बर संख्यामा मतदान केन्द्र बन्न सक्ने अनुमान गरिएको छ।

निर्वाचन आयोगका अनुसार एक मतदान स्थलमा १ देखि ८ मतदान केन्द्र हुन सक्छन् र प्रत्येक केन्द्रमा १०६४ मतदाताले एकै दिन मतदान गर्न सक्ने गरी संरचना बनाउनुपर्छ। यसै कारण नयाँ मतदाता संख्याले केन्द्र संख्या पनि बढाउने निश्चित छ।

यसपटक ८ लाख ३७ हजार ९४ मतदाता थपिएसँगै आगामी फागुन २१ को निर्वाचनमा कुल मतदाता संख्या १ करोड ९० लाख ५ हजार ३१४ पुग्नेछ। कात्तिक १६ सम्म दर्ता भएका मतदाता संख्या १ करोड ८१ लाख ६८ हजार २३० रहेको आयोगले जनाएको छ। आयोगले बढ्दो मतदाता संख्या र सहज मतदानका लागि आवश्यक पूर्वाधार विस्तारलाई प्राथमिकतामा राखेर तयारी अघि बढाइरहेको छ।