पोखरामा नेकपाको एकता सन्देशसभा, भीम रावलले ‘एमाले’ उल्लेख गरेपछि क्षणभरमा हलचल

Prime TV News १० घण्टा अगाडि

काठमाडौ । कास्कीको पोखरामा नेपाली कम्युनिस्ट पार्टीले आइतबार मंसिर १४ गते आयोजना गरेको एकता सन्देशसभामा पार्टीका शीर्ष नेताहरूले आ–आफ्ना धारणा सार्वजनिक गरेका छन् । पोखराको मानवअधिकार चोकमा भएको विशाल सभामा नेताहरूको उपस्थिति उल्लेख्य थियो ।

सभालाई सम्बोधन गर्ने क्रममा नेकपा नेता भीम रावलले भाषणको एक अंशमा ‘नेकपा (एमाले)’ भनेर उल्लेख गरेपछि क्षणभर हलचल भएको थियो । लामो समय एमालेमै राजनीतिक यात्रा बिताएका रावलले आउँदो प्रतिनिधिसभा निर्वाचनमा “एमालेले बहुमत ल्याउने” भनेपछि केहीबेर मात्रै उनी स्वयंले शब्द सुधार गर्दै नेपाली कम्युनिस्ट पार्टीलाई कसैले रोक्न नसक्ने दाबी गरे ।

रावलले भने, “चिप्लेढुंगामा धेरै वर्षपछि तपाईंहरूबीच उपस्थित हुन पाउँदा खुशी लागेको छ । धनगढी, लमहीपछि पोखरामा पनि यति ठूलो जनसमुदाय देख्दा हाम्रो यात्रालाई कसैले रोक्न सक्दैन भन्ने विश्वास अझै दृढ भएको छ ।”

आफ्नो भाषणमा उनले कार्यकर्तालाई साथ दिन आग्रह गर्दै सो पार्टीले समृद्ध नेपालका लागि दृढ नेतृत्व प्रदान गर्ने प्रतिबद्धता जनाए । रावलले हालै मात्र विभिन्न दल/समूह मिलेर कात्तिक १९ गते गठन भएको नेपाली कम्युनिस्ट पार्टीमा प्रवेश गरेका हुन् । उनलाई कात्तिक २६ गते पार्टी प्रवेश गराइएको थियो ।

यसअघि नेकपाले दाङको लमही र कैलालीको धनगढीमा पनि एकता सन्देशसभाहरू सम्पन्न गरिसकेको छ । पार्टीले यी कार्यक्रमलाई संगठन विस्तार र आगामी राजनीतिक अभियानका तयारीको रूपमा लिएको बताइएको छ ।