व्यक्तिगत कर्जाको सीमा दोब्बर, अब १ करोडसम्म पाउन सकिने

Prime TV News ५१ मिनेट अगाडि

काठमाडौ । नेपाल राष्ट्र बैंकले व्यक्तिगत कर्जासम्बन्धी व्यवस्था परिमार्जन गर्दै यसको सीमा दोब्बरले बढाउने निर्णय गरेको छ। सोमबार सार्वजनिक गरिएको चालु आर्थिक वर्ष २०८२/८३ को मौद्रिक नीतिको पहिलो त्रैमासिक समीक्षामार्फत राष्ट्र बैंकले यो परिवर्तन गरेको हो।

समीक्षा अनुसार, हाल बैंक तथा वित्तीय संस्थाबाट उपलब्ध हुने व्यक्तिगत अधिविकर्ष कर्जाको सीमा ५० लाख रुपैयाँ रहेकोमा अब यसलाई बढाएर १ करोड रुपैयाँ कायम गरिने निर्णय गरिएको छ। राष्ट्र बैंकका अनुसार आर्थिक गतिविधि प्रवर्द्धन र व्यक्तिगत नगद प्रवाह सहज गराउने उद्देश्यले सीमा वृद्धिको नीति अपनाइएको हो।

वित्तीय क्षेत्रमा कर्जा माग उच्च रहँदा ग्राहकको व्यक्तिगत आवश्यकतासँग मेल खाने तथा वैध आय स्रोत अनुकूल कर्जा पहुँच अभिवृद्धि गर्ने रणनीतिको रूपमा यो कदम व्याख्या गरिएको छ। नयाँ सीमा लागू भएपछि ग्राहकले पूर्ववत् प्रक्रिया तथा मूल्यांकन आधारमै अधिविकर्ष सुविधा लिन सक्नेछन्।

विशेषज्ञहरूका अनुसार सीमा वृद्धि हुनुले उपभोक्तालाई तत्कालीन तरलता व्यवस्थापनमा मद्दत गर्ने भए पनि कर्जा उपयोग अनुशासन, जोखिम व्यवस्थापन तथा व्याजदर संवेदनशीलता जस्ता पक्षमा बैंक तथा ग्राहक दुवैले जिम्मेवारीपूर्वक व्यवहार गर्नुपर्ने आवश्यकता बढेको छ। नयाँ व्यवस्था तत्काल लागू हुने जनाइएको छ।