शेयर बजार लगातार छैटौँ दिन पनि गिरावट, नेप्से सूचक ३.०२ अंक घटेर २६०६ मा

Prime TV News एक महिना अगाडि

काठमाडौ । शेयर बजार लगातार छैटौँ दिन पनि गिरावटमै रहँदा सोमबार नेप्से सूचक ३.०२ अंक घटेर २६०६ मा झरेको छ।

मंसिर ११ देखि सुरु भएको ओरालो यात्रामा नेप्से १७० अंकले कमजोर भइसकेको छ । जसको प्रमुख कारण राजनीतिक अस्थिरता र आगामी चुनावबारे अनिश्चितता भइरहेकाे बताइएको छ । सोमबार बजारमा ९९ कम्पनीको मूल्य बढे पनि १४७ कम्पनी घटे र १२ स्थिर रहे । कारोबार रकम अघिल्लो दिनको ५ अर्ब ३३ करोडबाट ४ अर्ब ६६ करोडमा झरेर बजारमा तरलता र सक्रियता दुवै घटेको संकेत दिएको छ ।

समूहगत सूचकमा मिश्रित अवस्था देखिँदा जलविद्युत्, जीवन बीमा, उत्पादन तथा प्रशोधन, निर्जीवन बीमा र व्यापार समूह अलि उकालो लागे भने बैंकिङ, विकास बैंक, फाइनान्स, होटल तथा पर्यटन, लगानी, माइक्रोफाइनान्स र अन्य समूहमा गिरावट आयो।

बजार समग्र रूपमा कमजोर रहे पनि अपर स्याङ्गे हाइड्रोपावर, स्वस्तिक लघुवित्त, झापा इनर्जी र श्रीनगर एग्रिटेकका सेयर मूल्य १० प्रतिशतले उक्लिए, जबकि इङ्वा हाइड्रोपावर र पियोर इनर्जीमा उल्लेख्य वृद्धि तथा सपोर्ट माइक्रोफाइनान्स, मेन्छियाम हाइड्रोपावर र गुहेश्वरी मर्चेन्ट बैंकमा उल्लेख्य गिरावट देखियो।

सोमबार सबैभन्दा धेरै कारोबार भएका कम्पनीमा ङादी ग्रुप, सागर डिस्टिलरी, पियोर इनर्जी, राधि विद्युत् र झापा इनर्जी परेका छन्।