ओलीले भदौ २३–२४ का घटनाबारे आयोगमा बयान दिनुपर्छः एमाले उपाध्यक्ष पोखरेल

Prime TV News एक महिना अगाडि

काठमाडौ । नेकपा एमालेका वरिष्ठ उपाध्यक्ष ईश्वर पोखरेलले पार्टी अध्यक्ष केपी शर्मा ओलीले भदौ २३ र २४ का घटनामा छानबिन गर्न बनेको आयोगमा उपस्थित भएर बयान दिनुपर्ने बताएका छन्। पोखरेल समूहले बुधबार पत्रकारहरूसँग गरेको अन्तरक्रिया कार्यक्रममा उनले ओलीले आयोगसँग सहयोग गर्नु नै उचित र जिम्मेवार कदम हुने बताए।

पोखरेलले आफू त्यही परिस्थितिमा परेको भए अनिवार्य रूपमा आयोगमा उपस्थित हुने बताए । “केपी शर्मा ओली आयोगमा बयान दिन जानुपर्छ,” उनले दोहोर्‍याउँदै भने, “यो राजनीतिक आचार, पार्टी संस्कार र सत्यतथ्य पहिचान सबैका दृष्टिले आवश्यक छ।”

अध्यक्ष ओलीले भने आयोग अध्यक्ष गौरीबहादुर कार्की आफूप्रति पूर्वाग्रही रहेको आरोप लगाउँदै बयान दिन नजाने अडान लिइरहेका छन्। कार्की नेतृत्वको छानबिन आयोगले भदौ २३ र २४ का घटनाबारे तथ्य सत्य उजागर गर्न सबै पक्षको बयान अपरिहार्य रहेको बताउँदै आएको छ।