विदेशी मुद्रा भित्र्याउन र बाहिर लैजान नियम संशोधित

Prime TV News एक महिना अगाडि

काठमाडौं – नेपाल राष्ट्र बैंकले विदेशी मुद्रा भित्र्याउने र बाहिर लैजान सम्बन्धी नियमहरूमा फेरबदल गर्दै नयाँ सूचना सार्वजनिक गरेको छ। नयाँ व्यवस्थाअनुसार, नेपाली र विदेशी नागरिकहरूले अमेरिकी डलर वा यसको बराबरको अन्य विदेशी मुद्रा भन्सार घोषणा नगरी ५ हजार डलरसम्म ल्याउन सक्नेछन्।

राष्ट्र बैंकका अनुसार, ५ हजार डलरभन्दा बढी रकम ल्याउँदा अनिवार्य रूपमा भन्सार घोषणा गरी प्रमाणित गराउनु पर्नेछ। त्यस्तै, भारतीय रुपैयाँको हकमा पनि अमेरिकी डलर ५ हजार बराबरको भारतीय रुपैयाँसम्म भन्सार घोषणा नगरी ल्याउन पाइने व्यवस्था गरिएको छ।

यसअघि  भारतीय ५०० र १ हजार रुपैयाँका नोटहरूको कारोबार, ओसारपसार र साथमा राख्न पूर्ण रुपमा प्रतिबन्ध लगाइएको छ। साथै, नेपाली नागरिकले भारतबाहेक अन्य मुलुकमा भारतीय रुपैयाँ लैजान वा अन्य मुलुकबाट भारतीय रुपैयाँ नेपाल ल्याउन पाउने छैनन्।

विदेशी विनिमय (नियमित गर्ने) ऐन, २०१९ र मनी लाउन्डरिङ निवारण ऐनको दफा अनुसार जारी गरिएको यो सूचना राष्ट्र बैंकको नियमित विदेशी मुद्रा व्यवस्थापन र वित्तीय सुरक्षालाई सुनिश्चित गर्नको लागि ल्याइएको हो।

विदेशी मुद्रा कारोबार गर्ने सबैलाई यस नियमको पालना गर्न राष्ट्र बैंकले अनुरोध गरेको छ।