जेनजी आन्दोलनमा उच्छृङ्खल गतिविधिमा संलग्न व्यक्तिहरूलाई रिहा गर्ने सरकारको सर्कुलर

Prime TV News २ महिना अगाडि

काठमाडौ । गृहमन्त्री ओमप्रकाश अर्यालको निर्देशनमा गृह मन्त्रालयले भदौ २४ मा जेनजी प्रदर्शनको क्रममा उच्छृङ्खल गतिविधिमा संलग्न व्यक्तिहरूलाई रिहा गर्ने निर्णय गरेको छ।

उक्त निर्णय प्रहरी प्रधान कार्यालयको माध्यमबाट देशभरका प्रहरी कार्यालयहरूमा सर्कुलर गरि थुनामा रहेका आरोपितहरूलाई ‘हाजिर जमानी’मा रिहा गर्न निर्देशन दिएको हो। रिहा भएका व्यक्तिहरूको संख्या ८७२ पुगेको छ र उनीहरू विरुद्ध ३९५ थान मुद्दा दर्ता भएको छ।

विशेष गरी, काठमाडौँको महाराजगञ्ज र कोटेश्वरमा प्रहरीको हत्यामा संलग्न व्यक्तिहरूलाई भने रिहा गरिएको छैन । उपत्यका प्रहरी कार्यालयका एक अधिकारीका अनुसार, “हत्यामा संलग्न व्यक्तिहरूलाई रिहा नगर्ने भनिएको छ, तर अरूलाई रिहा गर्न भनिएको छ।”

यो रिहाइ सरकार र जेनजी आन्दोलनको अगुवाहरू बीच भएको १० बुँदे सम्झौतामा आधारित छ। सम्झौतामा उल्लेख गरिएको २ नम्बर बुँदामा आन्दोलनमा संलग्न व्यक्तिहरूको छानबिन गरेर उच्चस्तरीय जाँचबुझ आयोगमार्फत स्क्रिनिङ गर्ने कुरा भनिएको छ।

यदि कुनै व्यक्तिले ज्यान मार्ने अपराध वा संगठित अपराधमा संलग्नता देखाएन भने, उनलाई तुरुन्त रिहा गर्न र मुद्दा फिर्ता लिने सिफारिस गरिएको थियो। सम्झौतामा स्पष्ट भनिएको छ कि ढुङ्गा हान्ने वा प्रतिरोधको क्रममा भएका घटनामा भने फौजदारी मुद्दा नचलाउने सहमति गरिएको थियो।

यसका बावजूद, स्क्रिनिङ नगरी रिहा गर्ने निर्णयबाट कानूनी प्रक्रिया र दण्डहीनतासम्बन्धी चिन्ताहरू उत्पन्न भएका छन् ।