नेकपा एमालेमा विधान संशोधनको प्रस्तावमा विवाद, पोखरेल समूहले विरोध जनायो

Prime TV News एक महिना अगाडि

काठमाडौ । नेपाल कम्युनिष्ट पार्टी एमालेको केन्द्रीय कमिटी बैठकमा पार्टीको विधान संशोधनको प्रस्तावमा गहिरो विवाद उत्पन्न भएको छ।

पार्टीको नेतृत्व संरचनामा सुधार गर्ने र पदाधिकारीसहित केन्द्रीय कमिटीको संख्या बढाउने प्रस्तावमा वरिष्ठ नेता ईश्वर पोखरेल समूहले असहमति जनाएका छन्। बैठकको सुरूवातमा पोलिटब्युरो सदस्य खिमलाल भट्टराईले पार्टीको १०औं महाधिवेशनको विधानलाई कायम राख्नुपर्ने र यदि आवश्यक छ भने केही थप गर्दै जानुपर्ने प्रस्ताव प्रस्तुत गरे।

उनले पार्टीको मूल संरचना बदल्नुको सट्टा, थप सुधार र परिमार्जनका लागि वर्तमान विधानलाई नै आधार बनाउनुपर्ने आवश्यकता रहेको बताए । यसै बीच, उपाध्यक्ष सुरेन्द्र पाण्डेले विधान संशोधनको आवश्यकता रहे ७० वर्षे उमेर हद र २ कार्यकालको सीमा पनि हटाएर जानुपर्ने बताए ।

उनका अनुसार यी सीमा हटाउनाले पार्टीको दीर्घकालीन व्यवस्थापन र नेतृत्वको सक्षमता सुधार गर्नेछ। तर, पोखरेल समूहका नेताहरूले विधानमा गरिएको सुधारको आधारमा यो प्रस्ताव अस्वीकृत गर्नुपर्ने र पार्टीको संरचनामा अत्यधिक परिवर्तन गर्नु उचित नहुने तर्क गरेका छन्।