अष्ट्रेलियाको बोन्डी बीचमा गोली चलेको घटना: ११ जनाको मृत्यु, प्रहरीद्वारा दुई जना पक्राउ

Prime TV News एक महिना अगाडि

काठमाडौ । अष्ट्रेलियाको प्रमुख पर्यटकीय स्थल बोन्डी बीचमा आज अपराह्न गोली चलेको घटनामा ११ जनाको मृत्यु भएको सिएनएनले जनाएको छ । न्यू साउथ वेल्स प्रहरीले घटनामा दुई जनालाई नियन्त्रणमा लिइएको जानकारी दिइएको छ ।

घटनामा दुई जना प्रहरी अधिकारी पनि घाइते भएका छन् । जसको अवस्था हालसम्म स्पष्ट गरिएको छैन। घटनाको छानबिन गर्दै प्रहरीले क्षेत्रलाई घेराबन्दीमा राखेका छन् र सर्वसाधारणलाई उक्त क्षेत्रबाट टाढा रहन आग्रह गरिएको छ।

प्रहरीले आफ्नो एक्स अकाउन्टमा पोस्ट गर्दै भन्यो, "बोन्डी बीचमा दुई जनालाई हिरासतमा लिइएको छ। तर प्रहरी अपरेसन अझै जारी छ, त्यसैले सर्वसाधारणलाई उक्त क्षेत्रमा जान नदिन अनुरोध गरिन्छ। कृपया सबै निर्देशन पालना गर्नुहोस् र प्रहरी घेरा ननाघ्नुहोस्।"

घटनामा 'एक्टिभ शूटर' भएको शंका गरिएको छ । प्रहरी त्यस सम्बन्धी सूचनामा अनुसन्धान गरिरहेको छ। सेभेन न्यूजको रिपोर्टअनुसार, घटनास्थलका स्थानीय बासिन्दाले गोली चल्ने आवाज सुनेको र सयौँ मानिसहरू बीचबाट भागिरहेको देखेको बताएका छन्।

बोन्डी बीच अष्ट्रेलियाको सबैभन्दा प्रसिद्ध समुद्र तटमध्ये एक हो । जहाँ प्रायः हजारौँ पर्यटक र स्थानीय बासिन्दा घुम्न आउने गर्दछन्। घटना भएका समय त्यहाँ धेरै मानिस उपस्थित थिए, जसले अचानक गोली चल्ने आवाज सुनेर अफरातफरी मचिएको थियो।

घटनाको तत्काल प्रभावमा सिड्नीका पुलिस र आपतकालीन सेवाहरू घटनास्थलमा सक्रिय छन्। प्रहरी अपरेसन चलिरहेको छ र स्थानीय अधिकारीहरूले घटनामा संलग्न अन्य व्यक्तिहरूको खोजी जारी राखेका छन्।

अधिकारिहरूले मानिसहरूलाई बोन्डी बीचको आसपासका क्षेत्रबाट टाढा रहन र सुरक्षा निर्देशिका पालन गर्न अपील गरेका छन्।