ओलीको लिस्टमा केन्द्रीय सदस्य परेका भीम आचार्यले दिए उपाध्यक्ष पदमा स्वतन्त्र उम्मेदवारी

Prime TV News एक महिना अगाडि

काठमाडौ । कोशी प्रदेशका पूर्वमुख्यमन्त्री एवं नेकपा एमालेका नेता भीम आचार्यले पार्टीको ११औं महाधिवेशनमा उपाध्यक्ष पदका लागि स्वतन्त्र उम्मेदवारी दर्ता गरेका छन्। ओली प्यानलबाट केन्द्रीय सदस्यको लिष्टमा परेका आचार्यले यसपटक पार्टीमा कामको मूल्यांकन र न्यायको पक्षमा उभिने उद्देश्यले उपाध्यक्ष पदमा उम्मेदवारी दिएका हुन्।

आचार्यले मनोनयन दर्ता पछि आफ्नो विचार व्यक्त गर्दै भने, "पार्टीमा कामको मूल्यांकन हुनुपर्छ। म उपाध्यक्ष पदमा उठ्दैछु ताकि पार्टीको कामको मूल्यांकन गर्न र न्याय स्थापित गर्न सकियोस्।" उनी पार्टीका कार्यकर्ता वर्गसँग नजिक रहेको र पार्टीको नेतृत्वमा सुधारको आवश्यकता रहेको धारणा राख्छन्।

भीम आचार्यले नवौं महाधिवेशनमा सचिवको जिम्मेवारी सम्हालेका थिए र पछि कोशी प्रदेश सरकारका मुख्यमन्त्रीको रूपमा कार्य गरेका थिए। यद्यपि, हालै उनले पोखरा अन्तर्राष्ट्रिय विमानस्थल भ्रष्टाचार प्रकरणसँग जोडिएको मुद्दामा अदालतमा घेरिएका छन् । आचार्यले आफूलाई स्वतन्त्र उम्मेदवारको रूपमा प्रस्तुत गर्दै, पार्टीको समृद्धिका लागि न्यायपूर्ण नेतृत्वको आवश्यकता औंल्याएका छन्।