नेपाली कांग्रेसमा विवाद: शेखर कोइरालाले सभापति देउवासँग भेटे

Prime TV News ४ हप्ता अगाडि

काठमाडौ । नेपाली कांग्रेसका नेता शेखर कोइरालाले सभापति शेरबहादुर देउवासँग भेटवार्ता गरी पार्टीभित्रको सदस्यता व्यवस्थापन र अनुशासन कारबाहीका विषयमा छलफल गरेका छन्। भेटमा कोइरालासँगै केन्द्रीय सदस्य डा. मिनेन्द्र रिजाल पनि उपस्थित थिए।

कोइरालाका अनुसार, क्रियाशील सदस्यता व्यवस्थापन समितिले क्रमसंख्या उल्लेख नगरी फारम जिल्ला–जिल्ला पठाउँदा पार्टीभित्र जटिल समस्या उत्पन्न भएको छ। उनले सभापति देउवाबाट ती विना नम्बरका फारम फिर्ता गरेर नयाँ फारम पठाउने निर्देशन दिन आग्रह गरे। कोइरालाले भने कि “नम्बरविनाको फारमका आधारमा महाधिवेशन प्रक्रिया अघि बढ्न सक्दैन।”

साथै, कोइरालाले अनुशासन कारबाहीसम्बन्धी विषयमा पनि ध्यानाकर्षण गराए। उनले सबै कारबाही फुकुवा गरी पार्टी महाधिवेशन र आगामी आम निर्वाचनमा सबै नेता कार्यकर्तालाई खटाउन निर्देशन दिनुपर्ने धारणा राखे। उनका अनुसार, २०७९ सालको निर्वाचनमा गठबन्धनसम्बन्धी विवादका कारण अहिले कारबाही गर्नु उचित नहुनेछ।

महामन्त्री गगन थापा संयोजक रहेको क्रियाशील सदस्यता व्यवस्थापन समितिले क्रमसंख्या उल्लेख नगरिएका फारमहरू सुदूरपश्चिम प्रदेशमा पठाएको थियो ।