प्रशासनिक सुस्ततामाथि मन्त्री महावीर पुनको कडा प्रहार, ‘यस्तै गतिले देश अघि बढ्दैन’

Prime TV News ३ हप्ता अगाडि

काठमाडौ । शिक्षा, विज्ञान तथा प्रविधि मन्त्री महावीर पुनले नेपालको प्रशासनिक प्रणालीप्रति गम्भीर असन्तुष्टि व्यक्त गर्दै वर्तमान कार्यशैलीले सुशासन र विकासको लक्ष्य हासिल गर्न नसकिने बताएका छन्। सामाजिक सञ्जालमार्फत आफ्नो धारणा सार्वजनिक गर्दै उनले प्रशासनिक कामको गति कछुवाको चालभन्दा पनि ढिलो रहेको उल्लेख गरेका छन्।

मन्त्री पुनले आफ्नो छोटो कार्यकालमै देशका लागि केही सकारात्मक परिवर्तन ल्याउने प्रयास गर्दा अनेक बाधा भोग्नुपरेको अनुभव साझा गरेका छन्। कर्मचारीतन्त्रको सुस्तता, जटिल प्रक्रिया र निर्णय कार्यान्वयनमा हुने ढिलाइका कारण अपेक्षित परिणाम आउन नसकेको उनको भनाइ छ।

प्रशासनिक ढिलाइसँगै उनले प्रणालीभित्र सक्रिय स्वार्थी समूहप्रति पनि कडा टिप्पणी गरेका छन्। मन्त्री पुनका अनुसार, सुधारका प्रयासहरूलाई बीच–बीचमा उनले ‘कृपावादी पापी समूह’ भनेका तत्वहरूले अवरुद्ध गर्ने गरेका छन्। यस्ता समूहका कारण नीतिगत निर्णयहरू कार्यान्वयनमा जान नसक्ने र समग्र प्रशासन निष्क्रियजस्तै बन्ने अवस्था सिर्जना भएको उनले आरोप लगाए।

देशको विकास र सुशासनका लागि प्रशासनिक सुधार अपरिहार्य रहेको उल्लेख गर्दै मन्त्री पुनले वर्तमान प्रणालीमा गहिरो संरचनागत परिवर्तन आवश्यक भएको बताए। उनले स्पष्ट राजनीतिक इच्छाशक्ति र जिम्मेवार कर्मचारीतन्त्रबिना समृद्धिको सपना पूरा नहुने धारणा राखेका छन्।

मन्त्री पुनको यस अभिव्यक्तिले प्रशासनिक सुधार, सुशासन र कर्मचारीतन्त्रको भूमिकामाथि पुनः बहस सुरु गराएको छ। राजनीतिक नेतृत्व र राज्य संयन्त्रले अब कस्तो प्रतिक्रिया जनाउने भन्ने विषयमा सर्वसाधारणको चासो बढेको छ।