एमालेको नेतृत्व चयन लोकतान्त्रिक दृष्टिले सकारात्मक : कांग्रेस महामन्त्री शर्मा

Prime TV News ३ हप्ता अगाडि

काठमाडौ । नेपाली कांग्रेसका महामन्त्री विश्वप्रकाश शर्माले नेकपा एमालेको नेतृत्व चयन प्रक्रिया लोकतान्त्रिक दृष्टिले सकारात्मक सन्देश दिएको बताएका छन्।

महामन्त्री शर्माले भने, “अहिलेको प्रतिकूल परिस्थितिलाई चिर्दै महाधिवेशनबाट केही नयाँ र केही पुरानालाई अनुमोदन भएको छ। को आउने, को नआउने सम्बन्धित दलको आन्तरिक विषय हो।”

उनले नयाँ कमिटीले जेनजी आन्दोलनपछि बदलिएको राजनीतिक परिवेशलाई आत्मसात गर्नुपर्ने सुझाव पनि दिएका छन्। महामन्त्री शर्माले भने, “जेनजी प्रदर्शनले मुलुकमा सुशासनको मुद्दा स्थापित गरेको छ। यो सुशासनको मुद्दा नयाँ कमिटीले प्राथमिकतामा राख्नुपर्छ। प्रदर्शनप्रति पक्ष वा विपक्षमा मत व्यक्त गर्नु स्वभाविक भए पनि उठाइएको मुद्दा अस्वीकार गर्न सकिँदैन।”

साथै, महामन्त्री शर्माले सुशासन स्थापना गर्ने विषयमा सबै राजनीतिक दलहरूको साझा संकल्प आवश्यक भएको बताएका छन्। उनको भनाइले स्पष्ट हुन्छ कि नेपाली कांग्रेस एमालेको आन्तरिक प्रक्रियामा हस्तक्षेप नगर्ने पक्षमा छ, तर लोकतान्त्रिक मूल्य र सुशासनको महत्वलाई जोड दिइरहेको छ।