सिरियामा आईएसविरुद्ध अमेरिकाको निर्णायक सैन्य हमला

Prime TV News ३ हप्ता अगाडि

काठमाडौ । अमेरिकाले सिरियामा इस्लामिक स्टेट (आईएस) विरुद्ध ठूलो स्तरको सैन्य आक्रमण सुरु गरेको छ। अमेरिकी सेनामाथि भएको घातक आक्रमणको प्रतिशोधस्वरूप यो कारबाही गरिएको वाशिङ्टनले जनाएको छ।

अमेरिकाका रक्षा सचिव पिट हेगसेथले ‘अपरेसन हकआई स्ट्राइक’ अन्तर्गत आईएसका लडाकु, उनीहरूका आधार क्षेत्र र हतियार भण्डारलाई पूर्ण रूपमा नष्ट गर्ने उद्देश्य रहेको बताएका छन्। उनका अनुसार यो अभियान आईएसको पुनःउत्थान रोक्न केन्द्रित छ।

अमेरिकी अधिकारीहरूका अनुसार मध्य सिरियाका विभिन्न स्थानलाई लक्ष्य गरी लडाकु जेट, हेलिकप्टरबाट आक्रमण गरिएको हो। यस सैन्य अभियानमा जोर्डनीका विमानहरू पनि सक्रिय रूपमा संलग्न रहेका छन्।

अमेरिकी राष्ट्रपति डोनाल्ड ट्रम्पले आईएसको नियन्त्रणमा रहेका गढहरूमा अत्यन्त कडा आक्रमण भइरहेको जनाउँदै आतंकवादी समूहलाई कुनै पनि हालतमा सुरक्षित बस्न नदिइने चेतावनी दिएका छन्।

डिसेम्बर १३ मा सिरियाली सहर पालमिरामा आईएसले गरेको आक्रमणमा दुई अमेरिकी सैनिक र एक अमेरिकी नागरिक दोभाषेको मृत्यु भएपछि अमेरिकाले सैन्य कदम चालेको हो।