नेप्से परिसूचक बढ्यो, कारोबार रकम घट्यो: एसवाई प्यानल नेपाल शीर्ष स्थानमा

Prime TV News ३ हप्ता अगाडि

काठमाडौ । नेपाल स्टक एक्सचेन्जमा आजको कारोबारमा प्रमुख परिसूचकहरू बढेर बन्द भएका छन्।

मंगलबारको कारोबार दिन, नेप्से परिसूचक ३.२७ अंकले वृद्धि गर्दै २५८४.४९ अंकमा पुगेको छ। यस दिन सेन्सेटिभ इन्डेक्स १.५७ अंक, फ्लोट इन्डेक्स ०.१२ अंक र सेन्सेटिभ फ्लोट इन्डेक्स ०.३१ अंकले बढेका छन्। आजको कारोबारमा १३४ कम्पनीको शेयर मूल्य बढेको छ भने ११७ कम्पनीका शेयर मूल्य घटेका छन्।

यस दिन कुल ८ कम्पनीको शेयर मूल्य स्थिर रहन सफल भएको छ। यद्यपि, नेप्से परिसूचक बढ्दा पनि कुल कारोबार रकममा सामान्य कमी आएको छ। सोमबारको ३ अर्ब ५१ करोड रुपैयाँको कारोबार तुलनामा आज ३२८ स्टकको ९२ हजार ७४६ पटकको कारोबारमा ३ अर्ब ४२ करोड ९८ लाख ९३ हजार रुपैयाँबराबरको ७६ लाख ६८ हजार कित्ता शेयर खरिदबिक्री भएको छ।

यस दिन एसवाई प्यानल नेपालको शेयर मूल्य सर्वाधिक ७.०१ प्रतिशतले वृद्धि भएको छ। अन्य प्रमुख वृद्धि हुने कम्पनीहरूमा गुराँस लघुवित्त वित्तीय संस्थाको शेयर मूल्य ६ प्रतिशत र सयपत्री हाइड्रोपावर र ग्रामीण विकास लघुवित्त वित्तीय संस्थाको शेयर मूल्य लगभग ६ प्रतिशतले वृद्धि भएको छ।

तर, सिटिजन लाइफ इन्स्योरेन्सको शेयर मूल्य भने ५.९७ प्रतिशतले घटेको छ। कारोबार रकमका आधारमा, एसवाई प्यानल नेपाल शीर्ष स्थानमा रहेको छ। सो कम्पनीको शेयर कारोबार ३० करोड ९८ लाख रुपैयाँबराबर भएको छ। त्यस्तै, सागर डिष्टिलरीको कारोबार पनि ८ करोड ५० लाख रुपैयाँभन्दा बढीको भएको छ।

आजको बजारमा १३ उपसमूहमध्ये ७ उपसमूहको परिसूचक बढेको छ, जबकि ६ उपसमूहको परिसूचक घटेको छ। अन्य उपसमूहको परिसूचक १.२८ प्रतिशतले वृद्धि भएको छ। विकास बैंक, लगानी, जीवन बीमा, म्युचुअल फण्ड, निर्जीवन बीमा र व्यापार उपसमूहका परिसूचक भने सामान्य घटेका छन्।