वाणिज्य बैंकहरूद्वारा ब्याजदरमा कटौती
Prime TV News २ हप्ता अगाडि 
काठमाडौं । नेपाली वाणिज्य बैंकहरूले असोज महिनाका लागि सार्वजनिक गरेको ब्याजदरमा कमी आएको छ। बैंकहरूले निक्षेपमा दिने ब्याजदर घटाउँदै लगेका कारण व्यक्तिगत मुद्दती निक्षेपको औसत अधिकतम ब्याजदर भदौको ५.५७ प्रतिशतबाट घटेर असोजमा ५.४६ प्रतिशतमा झरेको छ।
नेपालका २० वाणिज्य बैंकहरूमध्ये ९ वटाले ब्याजदर घटाएका छन्। ब्याजदर कटौतीसँगै व्यक्तिगत मुद्दती निक्षेपमा ०.११ प्रतिशत बिन्दु र संस्थागत मुद्दती निक्षेपमा ०.०८८५ प्रतिशत बिन्दुले कमी आएको छ। ब्याजदर घटाउने बैंकहरूमध्ये प्राइम कमर्सियल बैंक, सानिमा बैंक र एभरेष्ट बैंकले सबैभन्दा बढी ०.५० प्रतिशत बिन्दुले ब्याजदर घटाएका छन्।
यस्तै, सिटिजन्स बैंक र एनआईसी एशिया बैंकले ०.२५ प्रतिशत, कुमारी बैंकले ०.२० प्रतिशत, कृषि विकास बैंक र नेपाल बैंकले ०.१५ प्रतिशत र नेपाल एसबीआई बैंकले ०.०७ प्रतिशत बिन्दुले ब्याजदर घटाएका छन्। यसविपरीत, लक्ष्मी सनराइज बैंक र स्ट्याण्डर्ड चार्टर्ड बैंकले भने ब्याजदरमा सामान्य वृद्धि गरेका छन्।
लक्ष्मी सनराइज बैंकले ०.२५ प्रतिशत र स्ट्याण्डर्ड चार्टर्ड बैंकले ०.०५ प्रतिशत बिन्दुले ब्याजदर बढाएका हुन्। बाँकी ९ वाणिज्य बैंकहरूले भने भदौ महिनाको ब्याजदरलाई निरन्तरता दिएका छन्। ब्याजदरमा आएको कटौतीसँगै निक्षेपकर्ताको आम्दानीमा प्रत्यक्ष असर पर्ने देखिन्छ। तर, बैंकहरूले तरलता व्यवस्थापन र पूँजी लागत घटाउने उद्देश्यसहित ब्याजदर समायोजन गरिरहेका छन्।
नियामक निकाय नेपाल राष्ट्र बैंकले पनि हालसालै बैंकहरूको कर्जा प्रवाहमा देखिएको सुस्ततालाई ध्यानमा राख्दै ब्याजदर सन्तुलनमा ध्यान दिन सुझाव दिएको थियो।
