नेपाली कांग्रेसको महाधिवेशन र चुनाव तयारीमा विवाद: समयसीमा र जिम्मेवारीको विषयमा मतभेद

Prime TV News २ हप्ता अगाडि

काठमाडौ । नेपाली कांग्रेसको आगामी महाधिवेशनको मिति र चुनावी तयारीलाई लिएर पार्टीभित्र गम्भीर विवाद बढेको छ।

पार्टीका प्रवक्ता डा. प्रकाश शरण महतले समयमै क्रियाशील सदस्यता काम पूरा नभएका कारण महाधिवेशनको मिति प्रभावित भएको बताएका छन्। उनले चुनाव नजिकिदै गर्दा महाधिवेशनको संभावना निकै न्यून देखिएको बताए ।

नेपाली कांग्रेसले पुस २६ देखि महाधिवेशन गर्ने निर्णय गरेको थियो । तर क्रियाशील सदस्यताको प्रक्रिया समयमै सम्पन्न नभएपछि महाधिवेशनको तयारी प्रभावित भएको छ। पार्टी प्रवक्ता महतले भने, “अब हामी चुनावी तयारीमा ध्यान दिनु पर्छ। ढिला नगरी काम गर्नु हुँदैन, त्यसैले चुनावअघि महाधिवेशन गर्ने सम्भावना कम छ।”

पार्टीका महामन्त्री गगन थापा र विश्वप्रकाश शर्माले भने विशेष महाधिवेशनको पक्षमा अडान राखेका छन्। महाधिवेशनको कार्यतालिका ल्याउँदा यसलाई अव्यवहारिक भन्ने भन्दै, उनीहरूले पार्टीको वर्तमान नेतृत्वमा परिवर्तन नगरी चुनावको तयारी गर्न नसकिने दाबी गरेका छन्।

प्रवक्ता शर्मा भने, “हामीले महाधिवेशनको कार्यतालिका ल्याउँदा यसलाई अव्यवहारिक भनेका थियौँ, तर पार्टीको नेतृत्वले यसलाई स्वीकार्यो। अब जिम्मेवारी पूरा नगरेर अरूसँग दोष लगाउनु उचित छैन। हामी नियमित महाधिवेशनको पक्षमा छौँ, विशेष महाधिवेशन चाहिँ हुँदैन।”

केन्द्रीय कार्यसम्पादन समितिको बैठक निरन्तर चलिरहेको भए पनि महाधिवेशनको मिति र प्रक्रिया बारेमा कुनै सहमति बन्न सकेको छैन। संस्थापन पक्षका अधिकांश नेताहरू चुनावपछि वैशाख महिनामा महाधिवेशन गर्ने पक्षमा छन्।

तर, महाधिवेशन प्रतिनिधिहरूको बहुमतले भने विशेष महाधिवेशनको माग गर्दै पार्टी कार्यालयमा हस्ताक्षरद्वारा ज्ञापन पत्र बुझाएका छन्।