बीपी कोइरालासँगै गणेशमान सिंह, शैलजा आचार्य, खुमबहादुर खड्का, रामबाबु प्रसाईं, नीलाम्बर पन्थीलगायत नेताहरू पनि करिब आठ वर्षको निर्वासन अन्त्य गर्दै नेपाल फर्किका थिए। त्यस समय भारतमा सिक्किम विलय भइसकेको र क्षेत्रीय अस्थिरता बढ्दै गएको अवस्थालाई मध्यनजर गर्दै उनीहरूले राष्ट्रिय एकता अपरिहार्य ठानेका थिए।

२०१७ साल पुस १ गते राजा महेन्द्रले गरेको शाही ‘कु’ पछि बीपी कोइरालालाई सिंहदरबारमा नजरबन्द गरिएको थियो। त्यसपछि सुन्दरीजलमा बन्दी बनाइएका उनलाई आठ वर्षपछि उपचारका लागि भारत जान अनुमति दिइयो। तर भारतमै रहँदा पनि उनले पञ्चायती व्यवस्थाविरुद्ध राजनीतिक संघर्ष जारी राखे।

स्वदेश फर्किएलगत्तै उनी पुनः पक्राउ परे र सुन्दरीजल तथा महाराजगञ्जस्थित बन्दीगृहमा राखिए। पछि २०३४ साल जेठ २७ गते पुनः उपचारका लागि रिहा गरिएको थियो। हाल सुन्दरीजलको सो बन्दीगृह २०६१ सालदेखि बीपी सङ्ग्रहालयका रूपमा सञ्चालनमा छ ।