महामन्त्रीद्वयले २ हजार ४८८ महाधिवेशन प्रतिनिधिले माग गरेको दाबी गर्दै पुस २७ र २८ गते विशेष महाधिवेशन आह्वान गरेका छन्। तर यसलाई पार्टी विधानविपरीत र असंवैधानिक कदम भन्दै संस्थापन पक्ष र डा. शेखर कोइरालाले नेतृत्व गरेको समूह खुलेआम विपक्षमा उभिएको छ।

विशेष महाधिवेशनलाई कसरी रोक्ने, कमजोर बनाउने वा राजनीतिक रूपमा असफल बनाउने भन्ने रणनीति तय गर्न डा. कोइरालाले सभापति देउवासँग भेट गरेको बुझिएको छ।

अघिल्लो महाधिवेशनमा देउवाका कडा प्रतिस्पर्धी रहेका कोइराला यसपटक भने विशेष महाधिवेशनको मुद्दामा संस्थापनसँगै उभिएका छन्, जसले पार्टीभित्रको अवसरवादी राजनीतिलाई अझ स्पष्ट पारेको छ।

कांग्रेसभित्र नेतृत्वले समस्या समाधान गर्न नसक्दा विवाद नियन्त्रणबाहिर जान थालेको छ। महामन्त्रीहरू खुलेआम सभापतिविरुद्ध उत्रिएका छन् भने सभापति र इतर समूह आन्तरिक लोकतन्त्रको नाममा उठेको मागलाई दबाउने रणनीतिमा जुटेका छन् ।