सुनको मूल्य वृद्धि, चाँदीको मूल्यमा भने गिरावट

Prime TV News एक महिना अगाडि

काठमाडौं ।  नेपाली बजारमा बुधवार सुनको मूल्यमा सामान्य वृद्धि भएको छ भने चाँदीको मूल्य ओरालो लागेको छ। नेपाल सुनचाँदी व्यवसायी महासंघले सार्वजनिक गरेको पछिल्लो दरअनुसार छापावाल सुनको मूल्य तोलामा १ लाख ९९ हजार रुपैयाँ पुगेको छ।

अघिल्लो दिन मंगलबार यसको मूल्य तोलामा १ लाख ९८ हजार ७ सय रुपैयाँ थियो। यसअनुसार, एक दिनको अन्तरमा सुनको मूल्य ३०० रुपैयाँले बढेको हो। त्यस्तै, १० ग्राम छापावाल सुनको मूल्य बुधवार १ लाख ७० हजार ६१० रुपैयाँ निर्धारण गरिएको छ। यसैबीच, चाँदीको मूल्य भने घटेको छ।

मंगलबार तोलामा २ हजार ३६० रुपैयाँ रहेको चाँदी बुधवार घटेर २ हजार ३४५ रुपैयाँमा झरेको छ। मूल्यमा १५ रुपैयाँको गिरावट आएको हो। सुनचाँदी बजारको हालको अवस्था हेर्दा, लगानीकर्ताले मूल्यको चाप र अन्तर्राष्ट्रिय बजारको उतारचढावलाई ध्यानमा राखेर निर्णय गर्नु उपयुक्त देखिन्छ।

लगातार उतारचढाव भइरहेकाले दैनिक दरमा सजग रहन व्यवसायीहरूको सुझाव छ।