कांग्रेस आधिकारिकता विवादमा शेखर कोइराला समूह अदालतभन्दा आन्तरिक छलफलमा केन्द्रित

Prime TV News एक महिना अगाडि

काठमाडौ । नेपाली कांग्रेसको आधिकारिकता सम्बन्धी विवादमा निर्वाचन आयोगले गरेको निर्णयविरुद्ध पार्टीभित्र फरक–फरक धार देखिएको छ । देउवा पक्षका नेताहरू सर्वोच्च अदालत पुगे पनि नेता डा. शेखर कोइराला र उनीनिकट समूह भने अदालत नगई आन्तरिक छलफलमा जुटेका छन् ।

निर्वाचन आयोगको निर्णयले कांग्रेसको ठूलो हिस्सालाई पार्टीविहीन बनाउने र आगामी निर्वाचनमा सहभागी हुन नपाउने अवस्था सिर्जना हुन सक्ने भन्दै देउवा पक्षका निवर्तमान कार्यवाहक सभापति पूर्णबहादुर खड्कासहित विमलेन्द्र निधि, मीनबहादुर विश्वकर्मालगायत नेताहरूले सर्वोच्च अदालतमा रिट निवेदन दर्ता गराएका छन् ।

तर शेखर कोइराला पक्ष भने कानुनी लडाइँभन्दा अगाडि बढेर संगठनभित्रै रणनीति तय गर्ने तयारीमा देखिएको छ । पछिल्लो राजनीतिक अवस्थाबारे छलफल गर्न डा. कोइरालाले आज दिउँसो १ बजे आफ्ना निकटका नेताहरूको बैठक बोलाएका छन् ।

यस अघि हिजो बिहान आफ्ना समर्थक नेताहरूसँगको छलफलमा डा. कोइरालाले आफूहरू विपक्षी भूमिकामा रहेकाले अदालतबाटै न्याय खोजिने बताएका थिए । यद्यपि, आज सर्वोच्च अदालतमा कोइराला समूहका नेताहरूको उपस्थिति देखिएन ।

शुक्रबार देउवा पक्षले सानेपामा आयोजना गरेको बैठकमा पनि डा. कोइराला सहभागी भएका थिएनन् ।