कांग्रेसको विशेष महाधिवेशनबाट निर्वाचित कार्यसमितिले देउवालाई सक्रिय राजनीतिभन्दा माथि उठेर संरक्षक र अभिभावकीय भूमिकामा बस्न आग्रह गर्दै आएको थियो। सोही सन्दर्भमा देउवाले चुनावी प्रतिस्पर्धाबाट अलग रहने निर्णय लिएको बुझिएको छ।

२०४८ सालदेखि डडेल्धुराबाट लगातार चुनाव जित्दै आएका देउवा सात पटक सांसद निर्वाचित भइसकेका छन्। तीन दशकभन्दा बढी समय संसद र सरकारको केन्द्रमा रहेका देउवाको निर्वाचनबाट बहिर्गमनलाई कांग्रेसभित्र युगको अन्त्यका रूपमा हेरिएको छ।

देउवाले चुनाव नलड्ने निर्णय सार्वजनिक भइरहँदा पार्टीभित्र अर्को सन्देश पनि स्पष्ट भएको छ। उनकी पत्नी आरजु राणा देउवा यसपटक कांग्रेसको टिकटबाट वञ्चित भएकी छन्। कैलाली–५ मा कांग्रेसले आरजुलाई नदिई नारायण शाहलाई उम्मेदवार बनाएको छ ।