आयोगले माघ ९ गते बिहान १० बजेदेखि दिउँसो १ बजेसम्म उम्मेदवारलाई नाम फिर्ता लिने अवसर दिएको छ। सोही दिन दिउँसो १ बजेदेखि ३ बजेसम्म उम्मेदवारको अन्तिम नामावली सार्वजनिक गरिनेछ भने दिउँसो ४ बजेदेखि साँझ ७ बजेसम्म निर्वाचन चिन्ह वितरण गरिने कार्यक्रम तय गरिएको छ।

प्रतिनिधिसभा सदस्य निर्वाचनतर्फको मनोनयन दर्ता प्रक्रिया देशभरका मुख्य निर्वाचन अधिकृत तथा निर्वाचन अधिकृतको कार्यालयमा उत्साहजनक र शान्तिपूर्ण रूपमा सम्पन्न भएको निर्वाचन आयोगले जनाएको छ। आयोगका अनुसार पहिलो हुने निर्वाचित हुने प्रणालीतर्फ कुल २ हजार ९ सय २५ जनाको उम्मेदवारी परेको छ।

कार्यवाहक प्रमुख निर्वाचन आयुक्त रामप्रसाद भण्डारीले मनोनयन प्रक्रिया शान्तिपूर्ण रूपमा सम्पन्न हुनुलाई लोकतन्त्रको सकारात्मक संकेत भन्दै राजनीतिक दल, उम्मेदवार र सरोकारवाला सबैलाई धन्यवाद दिएका छन्। उनले आगामी निर्वाचनका बाँकी चरणमा पनि सबै पक्षको सहयोग अपेक्षित रहेको उल्लेख गरेका छन्।

निर्वाचन आयोगका सचिव कृष्णबहादुर राउतका अनुसार उम्मेदवारमध्ये ३ सय ३६ महिला र २ हजार ५ सय ८९ पुरुष छन्। यस्तै ८५ जना अपाङ्गता भएका व्यक्ति र १ सय ३८ जना पिछडिएको क्षेत्रबाट उम्मेदवारी दर्ता भएको आयोगले जनाएको छ।