भीषण हिमपातले अफगानिस्तान तहसनहस, तीन दिनमै ६१ जनाको ज्यान गयो

Prime TV News एक महिना अगाडि

काठमाडौ । अफगानिस्तानमा लगातार तीन दिनदेखि परेको भारी हिमपात र वर्षाले देशका धेरै भागमा विनाश मच्चाएको छ।

अफगानिस्तानको विपद् व्यवस्थापन एजेन्सीका अनुसार यो प्राकृतिक प्रकोपका कारण कम्तीमा ६१ जनाको मृत्यु भएको छ भने १०० भन्दा बढी घाइते भएका छन्।

हिमपात र हिमपहिरोका कारण ४०० भन्दा बढी घर पूर्ण रूपमा ध्वस्त भएका छन्। दुर्गम र पहाडी क्षेत्रमा सञ्चार र यातायात अवरुद्ध भएकाले वास्तविक क्षतिको विवरण अझै संकलन हुन नसकेको जनाउँदै मृतक र घाइतेको संख्या बढ्न सक्ने एजेन्सीले चेतावनी दिएको छ।

भारी हिमपातका कारण राजधानी काबुललाई उत्तरी प्रान्तहरूसँग जोड्ने हिन्दुकुश क्षेत्रको मुख्य राजमार्गसहित धेरै सडक बन्द भएका छन्। यसले राहत, खाद्यान्न र औषधि आपूर्तिमा गम्भीर समस्या सिर्जना गरेको छ।

बामियान, परवान, बल्ख र मैदान वर्दकजस्ता प्रान्तहरूमा जनजीवन अत्यन्त कष्टकर बनेको छ। कठोर जाडो, भत्किएका घर र सीमित उद्धार क्षमताले हजारौँ नागरिक जोखिममा परेका छन्।